Komrat kasabası N.Hoca adına uşak başçasında üüretmäk-terbietmäk proţesi gagauz dilinä, adetlerinä, istoriyasına sevgiylän geçer. Bu gün orada Gagauzların en önemni yortuların birisini-Kasımı nışannadılar.
N.Hoca adına uşak başçasında gagauz halk adetlerini büük sevgiylän hem sıcaklıklan uşaklara annadȇrlar. Uşaklar da Kasım yortusuna büük havezlän hazırlanȇrlar. Türkülär, oyunnar, gagauz halk adetleri büünkü yortunun özü oldular.
Gagauziya Üüretmäk bakannıın baş uzmanı Lidiya Ostaş nışannadı, ani yortularının adetlerini uşaklara göstermäk — o milli yortularımızı yaşatmak.
«Çok gözäl bir yortu geçti hem da sevineriz, ani bizim Gagauziyamızda uşak başçalarında bu yortuyu bakȇrlar, annadȇrlar onun için, hem uşaklar küçüklüktän bu yortuyu bileceklär, aylelerindä bakaceklar hem analara bobalara annadaceklar»,- Lidiya Ostaş nışannadı.
Nastradin Hoca adını taşıyan uşak başçasında yortulara dayma teklif edilerlär yazıcılır. Bu gün musaafir olarak yortuda Akademik Todur Zanet bulundu. O nışannadı, ani uşak başçasında yortuları geçirmäk uşaklara hem ana-bobalara milli yortularımızı aklılarında tutmaa hem bakmaa ihlam verer.
«Bän pek sevinerim, ani burada Hoca Nastradın uşak başçasında yortu herkeret üüsek uurda geçer. Bän herkeret söleerim, ani bizim üüredicilär, terbiedicilär olmasın bizim dilimiz hem kulturamız çoktan battıydı. Onnarın omuzlarında ölä büük ük , ama onnar verilmeerlär hem can sıcaklıını vererlär uşaklara»,- Akademik Todur Zanet nışannadı.
Nastradin Hoca adına uşak başçasında büünkü gündä üüretmäk-terbietmäk proţesi iki dildä götürüler-gagauzça hem rumunca. Bu iki halkın milli yortularını uşaklar pek severlär hem bekleerlär, nışannadı uşak başçasının öndercisi Veronika Kazak: «Biz yaşȇȇrız dolayda, neredä hem uşaklar, hem ana—bobalar savaşȇrlar dili, adetleri hem kulturayı korumaa. Büünkü yortuyu Natalya Kroytor hazırladı hem uşaklarlan geçirdi, ki onnar havezlensinnär , anaları- bobaları havezlendirsinnär».
Kasım yortusu gagauzlarda noyabr ayın 7-dä nışannanȇr hem en sevgili yortuların arasında bulunȇr.
Avtor: A.Terzi, operator: S.Georgiev, montaj: İ.Rezuneţ
Moldovanın hem Gagauziyanın en mekalı haberleri GRTnın Telegram kanalında!