Kazayak küüyün liţeyi nışannadı 55-ci yıldönümünü. Bu yılların süresindä okul geçti büük yolu — buradan çok başarannar çıktılar yaşamaya — bulup kendi erini. Liţeydä bilgilär geçirlenerlär sevgiylän, adetlär da büük saygıylan.
Yortulu gündä liţey doldu başarannarlan , gülümsemäklän hem paalı akılına getirmeklärlän. Musaafirlerin arasında üüretim bakanı, kuvet azaları, üüredicilär hem başarannar, kimin için okul ikinci ev oldu. Liţeyin direktoru Diana Fazlı kaarşıladı hepsini hem kutladı bu önemni günnän.
«Büün bizdä istoriya sayfası — okulun istoriyası, angısı oldu çoyumuz için, nicä ikinci ev. 1970-ci yılda bizim küüyümüzdä okul açıldı da o gündän şindiyä kadar hep ilerleer — dolu üüredicilerin adlarınnan, üürenicilerin seslerinnän hem can sıcaklıınnan. Şükür ederim hepsini kim çekettirdi hem ilerleder bu yolu»- nışannadı liţeyin direktoru Diana Fazlı.
Liţeyin istoriyası — o insannarın istoriyası, kim verdi yaşamasını terbi etmää hem üüretmää genç evladları, dedi Gagauziya üüretim bakanı Nataliya Kristeva: «Bu okul, angısına var nicä şüpesiz kalitä nışanını koymaa. Bu üüsek başarlar oldular ona görä, ani çok kişilär çalıştılar, bu gösterer üüredicilerin profesional uurunu, üüsek menecer bilgilerini, uşakların hem ana -bobaların annaşmasını hem üürenmeyä meraklanmasını. Gururuz , ani Kazayak liţeyin bulunêr Moldovanın en ii liţeylerin listesindä».
Şükürlük hem kutlamak laflarını söledi Gagauziya Bakannık komitetin başı ilk yardımcısı Ilya Uzun: «Sizin zanaatınız pek lääzımnıydı hem önemni. Açan siz alêrsınız uşaa üüretmää, bilmeersiniz ne olacek. Biz şükür ederiz sizi bilgilerär için, dayanmak için, angılarını siz uşaklarımıza verersiniz, siz kurêrsınız gelecää».
Yortulu olayda büük dikkatlık verildi üüredicilerin işinä. Genç uzmannar kabelttilär gramotaları üüretim bakannıından, çok yıl çalışan üüredicilerä dä diplomnar verildilär.Ayırı şükürlük laflarını söledilär liţeyin eks-direktoruna Anna Beliogloya, kimä verildi «Zaamet şannı» medalisi. Saalık durumunnan baalı Anna Belioglo yortuya gelämedi, ödülü onun kızı kabletti.
Kutladı liţeyi hem kollektivi GHT deputatı Kazayaktan Aleksandr Dülger: «İİ bilgilär burada kabledildilär, çoyu başarannar üüsek erlerdä üürenmää girdilär, nica Moldovada, ölä dä sınır aşırıda, oldular üüsek uurda uzmannar mediţinada, ürust uurunda, ekonomikada, biznesta. Bu büük iş, angısını üüredicilär yapêrlar her gün, bu pek zor bir zanaat».
Musaafirlerin arasında başarannar, kim can sıcaklıınnan akılına getirerlär okul vakıtlarını. İvanna Köksal , Parlament hem Halk Topluşun eks-deputatı bu okulu başardı.
«İsteerim şükür etmää insannarı, kim temel koydu bu okula,kim aldı cuvapçılık da baktılar bu okul tutunsun, üüredicilerimizä, angıları bizi kablettilär bütün üreklän, bilgi verdilär, biz da büün ayak üstündä durȇrız, bizi burada üüredäbildilär, insan yaptılar»,- İvanna Köksal söledi.
Kazayak küüyün primarı Grigoriy Kior kutladı liţeyin kolektivini bu onemni yortuylan.
«Profesional hem pek önemni bizim yaşamamızda. Burada çok kaliteli bilgileri vererlär üüredicilär hem terbi ederlär üüsek uurda başarannarı»,- Grigoriy Kior kutladı.
Kazayak küüyün liţeyi ilerleer, alıp ilk erleri Gagauziyada hem bulunarak devletin 30 en ii üüretim kurumnarın listesindä. Bakalavra ekzamennerin çıkışlarına görä, liţey iki yıl sıravardır bulunêr ilk erdä Gagauziyada.
Moldovanın hem Gagauziyanın en mekalı haberleri GRTnın Telegram kanalında!