Kazayak küüyündä anmak olayları geçtilär, angıları adalıydılar 1946-1947-ci yıllarda aaçlık kurbannarına. Adetä görä yaşayannar anmak erindä toplandılar — küüdä düzülü çan evceezi o erdä neredä o zeet çekän insannar gömülmüştülär.
Anmaa aaçlık kurbannarını geldilär erindeki kuvetlerin azaları, Halk Topluşun deputatı Aleksandr Dülger, erindeki muzey, Kultura evi uzmannarı hem yaşayannar. Zor vakıtlar için hem geçirilenän zeetlär için annattı Nina Semönovna Alekseenük — 1946-da o 5 yaşındaydı. Onun aklında tutmaklar — diri istoriya, angısı annadêr gagauz halkın kara günneri için.
«Lääzım alatlamaa, neçin ki omnar, kim geçirdi o aaçlıı, hepsindän dooru açıklêêrlar o çirkin vakıdı, diil kiyatlardan, ama söleerlär onu, neyi gördülär. Bän 5 yaşımdaydım, ama hepsini pek islää tutêrım akılımda. Evdä hiç bişey yoktu. Yaşayardık sadece ona, açan mamu bir çüveni mi, peerdeyi mi diişärdi bir auç una. Onu o koyardı aşlak suya da verärdi bizä, bu bütün günäydi. Yada açan diişärdi bir auççuk ekinä, o verärdi bana hem kardaşıma birkaç tenecik — biz oturardık soba yanında, birär-birär tenecikleri iyärdik, ama aalamaardık, istämäärdik»,- annattı Nina Semönovna Alekseenük.
Gagauziya Halk Topluşun deputatı Aleksandr Dülger kendi sözündä urguladı, ani «pek önemni akılımızda tutmaa gagauz halkın istoriyasının kara sayfalarını, korumaa hem anmaa kurbannarı, annatmaa evlad boylarına da. Açan bileriz geçmişleri, ozaman var kolaylık brakmamaa bu zorluklar tekrarlansınnar enidän». Nekadar önemnii geçirmää bölä anmak günnerini söledi Kazayak Kultura Evin başı Mariya Taka: «Bän düşünerim, ani herbir uşak, herbir insan, herbir yaşayan lääzım bu günü unutmasın, bilsin, andırsın, kolivalar lääzım kaldırılsınnar, lääzım okunsunnar kliselär, o cannara liturgiya okunsun. İsteerim sölemää, ani var nicä demää, ani bana zor sölemää, neçin deyni bän bu işleri geçirdim canımdan. Pek çok istoriya işittik bizim üüredicilerdän da, büük insannardan, angıları geçirmiş bu çirkin aaçlıı.Çirkin neçin deyni aaçlık diilmişti sade aaçlık, ama varmıştı türlü hastalıklar da, onnardan da çok insan ölmüş».
1946-1947-ci yılların aaçlıı Kazayak küüyün istoriyasında en kara hem güç sayfalarıydır. O vakıtlarda küü kaybetti iki buçuk bindän zeedä yaşayan.
Moldovanın hem Gagauziyanın en mekalı haberleri GRTnın Telegram kanalında!