Komrat devlet universitetindä Halklararası yunan dili gününü baktılar. Olayda pay aldılar: Moldovada Yunanistanın Büükelçisi Nikolaos Krikos, Rumıniyanın Büükelçisi Kristian-Leon Ţurkanu, Bulgariyanın Büükelçisi Maya Dobreva. Hep ölä din izmetçileri, erli kuvetlerin temsilcileri, KDU rektoru S.Zahariya, üüredicilär hem studentlär. Olayda yunan dili için laf gitti, onun zenginnii için hem Evropa kulturası ortamında eri için.
Halklararası yunan dili gününü KDU geçirmää Moldovada Yunanistan devleti Büükelçisi Nikolaos Krikos istedi. Bu ideyayı universitetin rektoru S.Zahariya tutturdu, çünkü bu kurum dostluk baalantılarını koruyȇr. Bundan kaarä KDU artık 20 yıl Yunan dili hem kulturası merkezi başarılı işleer.
«Biz hepsimiz hristianız. Dinimiz dä Yunanistannan baalı. Yunan dilindä büünkü gündä 13 milion insan lafeder. Elbetki onnarın taa zeedesi Yunanistanın hem Kipranın yaşayannarı. Bu dildä anılmış filosoflar lafedärdilär. Onun büük önemnii var»,- Sergey Zahariya çizgiledi.
Kendi sözündä Moldovada Yunanistan devleti Büükelçisi Nikolaos Krikos çizgiledi, ani dünnä kulturasında yunan dili özel eri kaplȇȇr.
«Biz geçennerdä KDU enilenmiş Yunan dili hem kulturası merkezini açtık»,- Nikolaos Krikos çizgiledi.
Moldovada Rumıniya devleti Büükelçisi Kristian-Leon Ţurkanu söledi, ani büünkü gündä dilleri bilmää lääzım.
«Yunan dili bizim dillerimizi dä diiştirdi. Örnek getirecäm. Biblioteka lafı bizim dilimizä yunan dilindän geldi. Bu lafın maanası “biblio” — “kiyat”, “theke” — “korumak eri”. Bütündän — kiyatları korumak için er. Yunan dilindän çok önemni laf başlamasının aldı»,- Kristian-Leon Ţurkanu Moldovada Rumıniya devleti Büükelçisi söledi.
Olayın süresindä yunan dilindä türlü yaratmaların payları annadıldılar. “Odisseya” ȇpika poemasının bir payını kendisi Moldovada Yunanistan devleti Büükelçisi Nikolaos Krikos duygusal annattı.
Artık 20 yıl Moldova vatandaşlarının yunan dilinnän hem Yunanistan kulturasınnan yunan dili üüredicisi Niki Papadopolou tanıştırȇr: «Yunan dili 40 asir artık kullanılȇr. Bu dildä filosoflar Aristotel hem Platon lafettilär. Bu dildä evel Yunan dramaturgları Ȇshil, Sofokl hem Evripid kendi yaratmalarının yazdılar. Biz Makedonskiy Aleksandırı anȇrız. Evangeliyayı yazmaa deyni yunan dili kullanıldı. Bu dildä Vizantiya padişıaaları ilk kanonnarı yazdılar».
Halklararası yunan dili gününü her yıl fevralin 9 bakılȇr.
Moldovanın hem Gagauziyanın en mekalı haberleri GRTnın Telegram kanalında!