Kıpçak küüyündä nışannadılar klisä yortusunu. Klisedä yortulu liturgiya geçti, sora da yaşayannar için yortulu programa gösterildi.
Saabaalendän Kıpçak küüyün yaşayannarı, küçüü-büüyü toplandılar ayozlu liturgiyaya. Hristiannar için bu gün ayırı bir yortu.
«Bizim yaşayannara isteerim sölemää saalık, bereket olsun, hepsi evlerdä dursun , gitmesinnär aşırıya, burada savaşsınnar kaldırmaa küüyü.
«İsteerim sölemää Kıpçak yaşayannarına annaşmak olsun , usluluk olsun. Büünkü yortu var büük yortu, Panayıya yortusu — bu klisä adına kullanılȇr, ki hererdä olsun annaşmak, islelik, ileri dooru kliselär işlesinnär, insan da gelsin, Allahı unutmasın, brakmasınnar».
Büük Panayıya yortusunun maanası için hepsi insannara söledi Kıpçak küüyün klisä izmetçisi Födor Karakalçev.
FÖDOR KARAKALÇEV Kıpçak küüyü Panayıya adına klisä izmetçisi
«Bütün hristiannara deyni bu var büük yortu, neçinki Panayıya büünkü gündä çıkȇr gökä, o uyuklamış — o geçilmeer, o uyuklȇȇr. Ayozlar da ona şaşȇrlar, görerlär nicä Panıya çıkȇr erdän gökä. O iş için bütün hristian dünnesinä deyni bu var pek paalı yortu, hepsicii sayêr bu yortuyu — bu yortunun adına kurulu var oruç ta. Kıpçaa deyni o büük yortu, neçin deyni Panayıya var bizim Anamız, angısı bu küüyü koruyȇr, örter, koruyȇr herbir fenalıktan».
Kıpçak küüyün primarı Oleg Garizan söledi, ani bu büük yortu önemni hepsi yaşayannar için hem hepsi pravoslav hristiannar için
OLEG GARİZAN Kıpçak küüyü primarı
«Büün bizim büük yortumuz, klisenin kurbanı büün, büün bizim Kıpçaan kurulma günü. Gagauzlarda bütün ortodox insannarda büük yortu. Bän isteerim kutlamaa en ilkin bizim kıpçaklıları, ani biz büün yaşȇȇrız, hepsimizä güneş şılȇȇr, ani bizdä büün var usluluk, var annaşmak, ani biz büün ayaktayız, sevineriz bizim uşaklara. Allah versin bizä bereket, uygunnuk, Gagauziyamıza bizim uzun ömür».
Kutladı Kıpçak küüyün yaşayannarını Bulgariyadan General-Kantarcıevo küüyün primarı Stefan Zenginov.
STEFAN ZENGİNOV General-Kantarcıevo küüyün primarı
«Biz geldik Bulgariyadan, gagauz küüyündän General-Kantarcievodan. Gagauzlara Kıpçakta çok seläm getirelim. Kutlu olsun yortunuz, kayet büük yortu, Panayıya bizdä da yapȇrız diil sizin gibi, ama bizdä da var Panayıya. Sizin herbir yortunuz bizdä da var, saa olsunnar, çok saalık».
Yortulu liturgiyadan sora klisä okulun üürenicileri hazırladılar hem teklif ettilär insannara konţert programasını.