Kıpçak küüyün Kultura Evindä Paskelä yortusuna adalı konţert geçti. Onu hazırladılar klisä okulun üürenicileri. Yortulu olaya toplandılar küüyün yaşayannarı herbir yaşta, musaafirleri, anaları -bobaları.
Kıpçak küüyün klisä okulun üürenicileri siiredicilerä gösterdilär zengin programayı Paskelä için türkülärlän, şiirlärlän, teatru koymasınnan, angıları baalıydılar Hristozun Ayozlu Dirilmesinä. Insannarın çoyu urguladı, ani konţert pek meraklıydı hem baaşladı siiredicilerä can sıcaklıını. Yaşayannar şükür ettilär klisä izmetçilerini, ani onnar uşakların ruhunu, inanını Allaha terbiederlär.
«Şükür Allaha, hepsi isläädi, gözäldi, geldik saa olsunnar, ani hazırlamışlar, oteţţ Födor , Vitaliy, üüredicişär onnara yardım etmiş, yalnız ii diil. İslää-hepsi gözäl».
«Pek islää beendim. Saa olasınız, ani çalışmışınız, erleştirmişiniz, pek isläydi. Büük yortu- o islää bir yortu, suslanmak yortusu. Hepsimiz onu annȇrız hem bileriz, ani hepsicii uslulukta islää».
Yortu konţertin ayırı atmosferasını kurdular Paskeleya adalı hazırlanmaklar, angıları doluydular iiliklän, sevgiylän hem saygıylan pravoslav adetlerinä, söledi Kıpçak küüyün klisä izmetçisi Födor Karakalçev: «Bu bizim adetimiz. Biz yapȇrız 14 yıl. Kaarşılamaa başka türlü bu yortuyu yok nicä- sevinmelik herbir taraftan her türlü olȇȇr. Neylän biz kutlȇȇrız hem nicä kaarşılȇrız o var bizim konţertımız. Biz bütün küüyä hepsinä daadȇrız bu haberi, ani Hristoz Dirildi ölülerdän — en büük haber. Bölä biz bütün ürektän savaşȇȇrız onu nasaat etmää bu büük yortuyu».
Kurucuların laflarına görä, Paskellä konţerti insannara gösterdi nekadar önemni inanmaa, korumaa Aylä zenginniklerini hem olmaa birliktä. Kıpçak bölä konţert 14 yıl sıravardır geçer.
Avtor: A. Karapirä, operator hem montaj: L. Arfonos
Moldovanın hem Gagauziyanın en mekalı haberleri GRTnın Telegram kanalında!