Regional resim galereyasında Sirkeli Galinanın eni kiyadın prezentaţiyası geçti. Paylaşmaa bu olayın sevinmeliinnän toplandılar avtorun tanıdıkları, dostları, üürenicileri.
Kiyadın tiparlanması Gagauziya Kultura bakannıın destäännän gerçeklendi. Finans yardımı bu uura Gagauz Dilini Kurtarmak Fondundan verildi. Gagauz dilinä, kulturasına deyni eni kiyadın dünneyä çıkması önemni bir olay, nışannadı Gagauziya Kultura bakanı Marina Semönova.
«Büün biz, sizin yardımınızlan, bararbar yazȇrız Gagauz halkın, kulturanın istoriyasını. Biz yaptık taa bir adım ileri dooru. Herkeret, açan biz bulunȇrız bu salonda, ba bir sergi açȇrız, ba bir toplantı kultura uurunda geçer, ba bir prezentaţiya-benim herkeret canımdan derin dalgalar geçerlär. Neçin deyni sevinerim , ani işimiz ilerleer, ani erindä durmȇȇr, ani kultura uurunda insannar çalışȇrlar. Bütün candan şükür ederim sizi, ani siz çalışȇrsınız hem bir kahraman gibi, evladlara var nicä örnek olasınız»,- nışannadı Semönova.
«Kısmet şafkı» kiyadı birkaç bölümdän toplu, birisi –şiirlär, ikincisi-proza, üçüncüsü-cevirmelär.
«Kiyadın adı «Kısmet şafkı» neçin ki burada var hem şiir, hem annatma. En onemni bu yaşamakta, açan insan duyȇr can sıcaklıını, iilik yapan insanın can sıcaklıını-biz yapȇrız iilik da duyȇrız bu sıcaklıı , da bu sayılȇr en büük kısmet şafkı»,- çizgiledi avtor.
Kiyatta toplu avtorun hem ilerdän yazılmış yaratmaları, hem eni yaratmalar. Avtor nışannadı, ani bu topluma girdi onun ilk şiiri dä «Ana dilim, Paalı dilim».
Bu gözäl olaylan avtoru kutlamaa geldilär onun dostları, iş kafadarları, üürenicileri, senseleleri.
«Pek mutluyum bu yaşamakta, ani ecel buluşturdu beni bölä bir insannan, nicä Galina Dm. Herkezi onu biler, olmalı, pek çok etiştirer, pek çok yapȇr, bu insan nicä bir sıcak ekmek, kim da yaklaşsa, o bütün üreklän herkezä yardım edecek , o bitki bukasını verecek, ki hepsi olsun islää»,-söledi üüredici Ekaterina Kılçik .
«Baktıynan bu kiyada-burada var ölä yaratmalar, angıları ilgilendirerlär herbir insanı. Saa olunuz, Galina Dmitrievna, hem sizä başarılar dilerim, sanȇrım bu kiyat bitki olmayacek»,- nışannadı gagauz dili üüredicisi.
Sirkeli Galinanın yaratmaları okulların üürenmäk programalarına da girerlär. Üürenicilär büük havezlän onnarı üürenerlär.
Sirkeli Galina oktäbrinin 12-dä Kirsovo küüyündä duudu. Gagauziyanın Şannı üüredicisi. 2018-ci yıldan beeri Gagauziya yazıcılar birlii azası. 2020-ci yılda kendi duuma küüyündä «Ana-boba evi» muzeyini açtı.
Avtor: A.Terzi, operator: S.Georgiev, montaj: A.Gerçu