İnsan, angısının yaşaması duuma erin hem büük dünnenin köprüsü oldu. Stefanida Karaseni — Gagauziyanın vatandaşı, angısı Sankt-Peterburgta yaşȇȇr, bakmadaan uzaklaa, kendi köklerininnän baalantıyı korudȇr hem hepsini yapȇr, ani aşırı devletlerdä dä Duuma erin, gagauzların kulturası yaşasın.
Gagauziyanın vatandaşı, Baurçi küüyündän çıkma, Stefanida Karaseni Rusiyada yakın 15 yıla yaşȇȇr, orada çalışȇr, orada gagauzluu yaşadȇr.
«Ne kaldı bizä dädulardan, malilerdän, analarımızdan da aklımda tuttum adetleri. Evimizdä adetlär geçirilärdilär. Mamu karılarlan toplaardı gagauzların adetlerini geçirmää. Yaptık Rusali gününü, Babu gününü, Kilim festivalini seftä Peterburgta yaptık avgustun 31. Yaptık mamu gününü»,- Stefanida söledi.
Aşırıda yaşamak Stefanidaya milletliini özlettirder, ozaman o başlȇȇr duuma erindän var olan evelki tertipleri, türlü el işlerini yaşanan erinä yavaş-yavaş taşımaa . Kahramanımız paylaşȇr, ani gagauz millet giimnerini giidiynän evellerä, ana-boba zamannarına daalȇr. Bu Stefanidanın hoşuna pek gider.
«Bizim insan uyansın da duysunnar kendilerini, ani biz da millet — gagauzuz. Beni millet rubalarınnan görärkenä, aklılarına getirerlär, ani nezamansa bu işleri gördülär, işittilär. O üzerä savaşȇrım götürmää bütün ürektän bu işi unudulmasın gagauzluk»,- ekledi o.
Peterburgta gagauz kulturasını Stefanida Karaseni aktiv çalıştırȇr. Teklif edilän oluşlara, yortulara büük havezlän katılȇr.
«Angı erä teklif ederlär, orayı da atributları götürerim. Temaya görä sţenariy yapȇrım da adetleri göstererim. Gagagauz köşesini düzerim nicä bir içer. Petrelär, çarşaflar, bantlar, dorojkalar, ramkalar, kilim, pala, pat koyȇrım, sofra, bakırlık hem mutlaka ikona. Biz inan insan, onun için İlk onnarı lääzım gösterelim»,- Stefanida nışannadı.
Peterburg gagauzkası dünnä milletlerinä gagauzları yaklaştırȇr Millet evindä gagauzların adetleri kendi erini hazırlayacek. Gagauz düün kukla kolekţiyasını Stefanida bu uur için Beşalmadan ustaya yalvardı hazırlasın. Bu uurlan da kahramanımız Duuma erinä geldi.
«Kolekţiyaylan isteerim göstermää mini teatrı. Bizim düüneri, Çotra, Fenţä olurdu, gençlär buluşurdular pınar başında, horular olardılar. Göstermää küçük variaţiyada. V dom naţionalnostey baaşlamaa isteerim bizim da naţiyayı görsünnär».
Düün kolekţiyasına 28 kukla girer. Onu hazırladı usta Beşalma küüyündän, SEDEF folklor kolektivin pay alanı Elena Çeban: «Bän onnarı bu insana deyni yaptı hem sevinerim, ani oarada da gösterecek gagauzları adetlerini. Burada bir büük düün. Gelin güvä, dever — deverka. Nicä söledi insan, ölä da savaştım yapmaa». «Allaa yardım etsin da yapsınnar evcääz nicä düşünersin. Sän da zanaatını ileri götür».
Stefanida Karaseni yaşamak erindä, Sankt –Peterburgta neetli gagauz muzeyini kurmaa da hepsi tertipleri, gagauzkaların adet, sıra el işlerini orayı erleştirmää.