Maasuz kolaylıklarlan insannar için hatır gütmäk — bu temaya Komratta buluşmak geçti. Proektin partnörları — Pro Evropa hem Keyston Moldova cümnä kurumnarı. Proektin süresindä yapıladılar aaraştırmalar, angıalrın çıkışları buluşmada açıklandılar.
Proektin ȇksperti, professor Alla Levitskaya geçirdi aaraştırmaları beş fokus gruppada türlü yaşamak erlerindä da belli etti bir sıra problema, angılarınnan karşı gelerlär diil sade kolaylıksız insannar, ama resurs merkezleri. Aaraştırmalar geçtilär 4 bölümdä, bu mobilnosti, kolay infrastruktura, klimat riskları insannara deyni hem gender deskriminaţiyası, medik koşullarına danışmak hem soţial uurunda kolaylıklar.
«Var nicä açıklamaa en büük problemayı , o ani bizim resurs merkezleri kabledämeerlär hepsi isteeneri, onnar kablederlär sade 16 yaşınadan, kimär keret 18 yaşınadan. Da 18 yaşından yukarı kalȇrlar esaba alınmadık. Onnara yok neredä toplanmaa, çoyu isteerlär işlemää»,- Alla Levitskaya nışannadı.
Pro -Evropa kurumun temsilcisi Snejana Delibaltova nışannadı, ani proektä katıldılar diil sade resurs merkezleri, ama saalıı korumak bakannıı hem soţial sigorta kasası.
«En önemni — bu araştırmalar, angılarını biz büün göstereriz yapılı üç bölümdän, bu diskriminaţiya , zorlatmak, klimat riskları hem mobilnost. Bu aaraştırmalar geçirildilär nicä küülerdä ölä da kasabalarda yaşayan insannarlan»,- Snejana Delibaltova nışannadı.
Proektin başı Aleksandr Gribinça açıkladı bu olayın önemniini.
«Proekt 6 ay sürttü. Bu diil uzun vakıt. Bu vakıdın içindä biz geçirdik 4 seminar, üçü Gagauziyada, neredä pay aldılar ȇkspertlär, biz topladık haberleri 5 fokus gruppadan Komrat, Kongaz, Çadır, Baş küüyü hem taa bir Komrat»,- Aleksandr Gribinça açıkladı.
Halk advokat ofisın bölümün başı Komratta Svetlana Mironova nışannadı, ani barabar proektin temsilcilerinnän hazırladılar kanon uurunda cümleleri, ki kolaylıksız insannara hem resurs merkezlerinä taa kolay olsun işemää hem yaşamaa.
«Biz söleeriz uşaklar için, angıları tamannȇȇrlar 18 yaşını, o sayılȇr büük da gelmeer başka merkezä, da bu aylä kalȇr yalnız kendi problemalarınnan, ki uşaa lääzım taa yardım. Assistent bu uura etişmeer. Onun için lääzım diiştirmää devletin yardımını, da vermää kolaylık bu insannar taa bakılsınnar hısımnarlan»,- Svetlana Mironova nışannadı.
Komrat kasabası primarı Sergey Anastasov söledi, ani erindeki büdjettan finaslanȇr “Fidancik” merkezi, hem kolaylıksız insannara yapılȇrlar hepsi koşullar ki onnar taa ii yaşasınnar.
«Hepsini ne biz büün yapȇrız, bu resurs merkezi da, angısını biz finaslȇȇrız, yakın üç million ley. Ama bu diil primariyanın işi. Ama bunu biz yapȇrız kendi paramızlan»,- Sergey Anastasov söledi.
Resurs merkezlerin temsilcileri açıkladılar problemaları, angılarınnan karşı gelerlär hem nesoy onnarı çözmää.
«Bän sayȇrım, ani problema var, ilk, ne isteeriz, ki olsun baalantı analar- bobalar erli kuvetlärlän. Ki bu insannar duysunnar, ani onnar lääzımnı».
«Uşakları 18 yaşından yukarı pek esaba almȇȇrlar, bu iş için biz danıştık nasaatçılara, ki onnar uzaltsınnar uşakların gelmesini merkezä, da onnar bizi tutturdular da verdilär kolaylık kabledelim uşakları 25 yaşınadan. Ama bizdä yok er, nereyi onnarı kabletmää».
«Baş problema bu finaslamak, biz onu ministerliktän kabletmeeriz, primariyadan. Olacek vergilär, çalışacez. Olmayacek işlämeyecez».
Analar- bobalar annattılar, angı problemalarlan karşı gelerlär hem ne lääzım yapmaa ki onnarı çözmää.
«İlk — benim uşaklarım bensiz yapamȇȇrlar bişey, onnar bana baalı, hepsi çekiler ondan, nicä uşak kendisini cümnedä kullanȇr. Da sadece birerdä cümnäylän var nasıl bişey diiştirmää. Kendisi ana kalıp yalnız bişey yapmayacek».
Olayın süresindä diil sade açıkladılar proektin çıkışlarını, ama sesledilär erli kuvetlerin, resurs merkezlerin temsilcilerin cümlelerini hem anaların bobaların.
Moldovanın hem Gagauziyanın en mekalı haberleri GRTnın Telegram kanalında!