Moldova devleti Prezidenti Maya Sandu hem Hükümetin öndercisi İgor Grosu geçirdilär buluşmayı GHT deputatlarınnan hem Gagauziya avtonomiyanın erindeki kuvetlerinnän , ki çözmää soruşu, angısı baalı seçimnerin geçirilmesinnän, haberleer Hükümetin ofţial sayfası. Buluşmanın süresindä devletin başı çizgiledi, ki açık , serbest hem kanona görä seçimnerin geçirilmesi mutlak olsun lääzım, angılarında merkez hem dolay kuvetlär pay alsınnar lääzım. Bitki-bitkiya iş grupasını kararlandı açmaa, angısına gireceklär merkez kurumnarın temsilcileri, GHT hem avtonomiyanın primarları. Onun neeti olacek çıkarmaa lääzımnı kararları, ki en kısa vakıtta seçimneri hazırlamaa.
Toplantıya katıldılar Prezident Maya Sandu, parlament öndercisi Igor Grosu hem da Merkez Seçim Komissiyası başın yardımcısı Pavel Postika. Günün ilk payında Gagauziya primarlarınnan toplantı geçti. Komrat kasabanın primarı Sergey Anastasov dedi ki, onu Gagauziya primarları başı ayırdılar, prezident Maia Sandunun görüşmesinä. Onun laflarına görä, devlet dialoguna avtonomiyadan 23 primar katıldı.
Sergey Anastasov, Komrat kasaba primarı: «Primarların birlii ondaydı, ki diil lääzım geçirmää seçimnäri, nicä 2023 yılda . Hepsi bu kıpımnardan biz görmeeriz bela, angısınnar avtonomiyamıza var nasıl zarar yapsınnar. Nicä da olmasa Halk Topluşu seçimleri geçirilecek, ama o koşullarlan , angılarını Moldova Devletimizdä var».
Günün ilk payında MD merkez kurumnarın temsilcileri dolayın primarlarınnan buluştular. Üülendän sora soruşlar bakılırdı GHT 10 deputatlarınnan. O diil formal buluşmaktı , nışannadı GHT başın işini götürän Nikolay Ormanji. İki da taraf annaştılar kurmaa grupayı , angısı regional kanonunnan hem MD seçimnerin kodeksinnän biri-birinä karşı bakılan soruşlarlan işleyecek. Onda işleyeceklär hak temsilcileri, GHT deputatları hem Devlet Merkez Seçim Kurumun temsilcileri.
Nikolay Ormanji GHT başı işini götürän: « Biz düşündük nicä bu durumu çözmää da geldik karara bir iş gruppasını kuralım, angısı Hederlez ayın 2 – nädän çalışacek. Ona girer deputatlar, yuristlar, parlamentin hem Merkez Seçim Komissiyasından temsilcilär. Umudumuz var ki, bir orta yola gelecez».
Grupannın işi geçecek formal hem diil formal taraflardan. Deputatlar umutlanȇrlar, ki mayın 2-sinädän geleceklär bir fikirä, çizgiledi Nikolay Ormanjı. Kirez ayın 21-dä seçimnär olmayaceklar, seçim proţesi taa çeketmedi, açıkladı GHT başı işini götürän N. Ormanji: «Geçirämeyecez seçimneri kirez ayın 21-dä , neçinki büün çiçek ayın 24-dü, da 60 günädän seçimnerädäk imzalamak listeleri hiç çeketmedilär verilmää. Bu baalı daavanın kararınnan , ki ilerdän kabledinän kararları durgutmaa».
Nikolay Ormanji açıkladı, ani umutlanȇr hederlez ayın çeketmesinädän düzülecek annaşmak, angısı yardımnayacek hazırlanmakları seçimnär için çekettirmää .
Moldovanın hem Gagauziyanın en mekalı haberleri GRTnın Telegram kanalında!