Sentäbrinin 16 — da geçti muniţipal nasaatın sırasız oturuşu. Nasaatçılar çıktılar iniţiativaylan, baksınar deyni erli kuvetlerin işini ileri dooru. Bakmadaan buna, oturuş geçmedi o üzerä, ani toplanmadı kvorum.
Komrat kasabasının primarı Sergey Anastasov nışannadı, ani nasatçıların çoyu gelämedilär o üzerä, ani pek geç üürendilär toplantının geçirilmesi için, bir boyu sa şindän sora gittillär.
«Çaаrdık muniţipal oturuşunu, açıklamaa deyni kendi fikirlerimizi yakalamaklar için, angıları geçerlär primariyada, neçinki diil bir olay, ama şindän sora üç. Biz aaramamızda lafettik, ama kvorum yoktu, neçinki sade dün avşamnen haberledilär, da çoyu gittillär, diil ondan, ani istämeerlär. Ondan sora, nicä bakılacek advokatlarlan, o zaman belli olacek, ne yapmaa ileri dooru, neçinki zamandaşta , hiç bilmeeriz ne yapmaa»,- Sergey Anastasov nışannadı.
Primar haberledi, ani kurulu komissiya beş kişidän, angısı zanaatlanȇr içindeki aaraştırmaklarlan, angıları toplandılar bitki vakıtlar. Sergey Anastasovun laflarına görä, komissiya azaları pek islä bilerlär primariyanın işini, da kontrol ermesini geçiräbileceklär.
«Eеr biz istärsäydik yardım etmää, ozaman lääzım yapmaa bunu susarak. Lääzım advokatlarlan lafetmää, bakmaa hepsi momentleri. Hepsindän karä, biz geçireriz içindä da araştırmaları. Biz kattık komissiyayı da beş kişidän, da biz işleeriz. Bundan sora biz haberleyecez. İsteerim sölemää, ani biz işi yaptık diil taa prost, nekadar başka bölümnär. Bu bizim soruşumuz, da biz taa islä bileriz, kimisi başkası bizim için»,- Sergey Anastasov nışannadı.
Kendi fikrini açıkladı Komrat kasabanın muniţipal nasaatçısı İvan Panä. O çizgiledi, ani oturuş geçmedi o üzerä, ani toplanmadı kvorum, da bakmaa deyni soruşu, angısı baalı yakalamaklarlan, var nasıl olacek sade ozaman, açan primar belli edecek taa derindän açık informaţiyayı hem da faktları.
«Büünkü oturuş, nicä bizä haberledilär — ansızdan, geçmedi, toplanmadı kvorum. Soruış işin günündä diildi koyulu nicä lääzım. Nicä biz annadık bu ilişti primarın yardımcılarına, ama bu diildi muniţipal nasaatın kararı. Muniţipal nasaatı diil lääzım kararlasın, yada sölesin bu iş için. İlk — lääzım primarın yardımcıları kendileri hem da Komrat kasabasının primarı söz tutsun, açıklasın durumu bu iş için. Biz bekleeriz açık informaţiyayı primardan»,- açıkladı Panä .
Getirecez aklılarınıza, ani taa ileri yakalandı Komrat kasabasının primarın iki yardımcısı. Onnarı kabatlı bulȇrlar kendi iş görevini kanona karşı kullanmasında. Bunadan, yakalandı primariyanın uzmanı da, angısı cevap eder kasabanın arhitekturası için.
Moldovanın hem Gagauziyanın en mekalı haberleri GRTnın Telegram kanalında!