Komrattakı Mihai Eminescu adına liţeydä robototehnika yarışmaları geçtilär — bunu hazırladı Gagauziya üüretim bakannıı. Olayda pay aldılar 18 üüretim kurumnarı bütün avtonomiyadan. Üürenicilär gösterdilär kendi becermeklerini robotların düzülmesindä hem onnara programaları izinnemesindä, gösterip kendi işlerini.
Okulcuların ilerlemesindä robototehnika uurunda yarışmalar üüsek eri alêrlar, neçin ki yardım ederlär logika düşünmeyi taa ii yapmaa hem meraklandırêr katılmaa zamandaş tehnologiyalara taa küçük yaştan, — nışannadı Gagauziya üüretim bakanı Nataliya Kristeva: «Büün robototehnika yarışması, 18 komanda türlü okullardan geldi. Onnar kendi işlerini getirdilär — robotlara lääzımdı ayırı programa versinnär ki onnar geeri kalmasınnar — şindi göstererlär kendi becermeklerini. Bunnar diil sadä robot, ani masada geziner, onnar bizim uşakların fikirleri. Ilk erleri kazanaceklar onnar, kim en aktual hem en zamandaş programalarlan».
Olayı kurucuların biri Liliana Beläk nışannadı,ani robototehnika dersleri yardım ederlär üürenicilerä diil sade tehnik becerneklerini almaa, ama ilerlederlär kritik düşünmeyi da, hep ölä da başka derslerdä taa islää çıkışları da göstererlär.
«Açan uşaklar pay alêrlar bölä olaylarda, onnar tehnik becerneklerini ilerlederlär hem taa başka uurları da. Onnar üürenerlär komandada çalışmaa, hep ölä da STEAM uurunda işleerlär. Ilerleer kritika düşünmesi, bilerlär strategiyaya görä fikirlerini koşêrlar»,- Liliana Beläk nışannadı.
Bir komandanın öndericisi söledi, nesoy bu yarışmaya hazırlanmaklar geçtilär, çizgileyip ani çok vakıt hepsi çalıştı ki burada pay almaa.
«Bizdä geçer «Clasa Viitorului» proektin birisi. Robotlar türlü datçiklärlän, motorlarlan toplu, programalı. Baş kuralların birisi- tarêêr ringta o kim onda kaldı, kim çıktı — o taradêr».
Pay alannar sölerlär, ani robototehnikayı ayırdılar, neçin ki o pek meraklı hem verer kolaylık kurmaa kendi proektlerini.
«Bän pek beenerim bu işi, neçin ki pek meraklı legoylan çalışmaa. Açan biraz var serbest vakıt, bän hep bulêrım kendimä zanaat. Islää açan yarışmalar da olêrlar. Buzim robotu biz iki-üç afta topladık».
«Zorluk hiç yoktu, biz istedik bununnan zanaatlanmaa, bizi ayırdılar da yaptık islää bir robot».
Grupa êtapın çıkışlarına görä finala 8 en kaavi komanda çıkacek, neredä 3 tarayan belli edilecek. Nicä sölerlär Üüretim bakannıın uzmannarı, IT uurun ilerlemesi avtonomiyada bitkiy 4 yılda geliştiriler. Bu vakıtta web-dizayn, storitelling, grafika dizaynası hem başka uurlarda olimpiadalar oldular.
Moldovanın hem Gagauziyanın en mekalı haberleri GRTnın Telegram kanalında!