Kongazçik küüyündä ilerleerlär işlär yol düzülmesindä Gagarina sokaanda. Yakın 220 metra asfalt konulacek, yolun genişlii da dört büçük metra kuracek. Bu neetlerä para yol fondundan verilecek.
Kongazçiktä genä işidiler yol tehnikasının sesi. Gagarina sokaanda remont işleri giderlär. İşçilär düzelttilär yolun üstünü da sora çekedeceklär asfalt koymaa. Gagarina sokaanda yolun düzülmesi için kararı küüyü nasaatı kabletti, haberledi küüyü primarı Evgeniy Tukan. O nışannadı, ani yol baalȇr uşak başçasını hem Domiki rayonunu. Bu yolda asfalt koyulacek da bundan sora transport hem insanın gezmesi taa ii olacek, urguladı primar.
«Çamur taşınmasın bir taraftan başka tarafa biz kararladık birleştirmää bu yolların iki payını. Da sayȇrım, ani bu islää karar da biz küüyün merkezini transporttan biraz boşandıracez. Uşakları yaslaya getirerlär da buradan Aşaadakı Kongazçaa Gagarina sokaandan gitmää olacek kolaylık. Sabaaylen olmayacek yol kapanması. Maşınalar yok nasıl dönsünnär, bekleerlär, işä geç kalȇrlar. Da bu problema bölä çözülecek»,- urguladı primar.
Gagarina sokaanda var hepsi komunikaţiya baalantıları da, bunun için yol düzülmesindä hem asfalt koymasında zorluklar olmayaceklar.
«Pek ilin hem serbest var nicä yolda asfalt koymaa, neçinki su hem kanalizaţiya geçirili da sora sıra gelmeyecek kazmaa da yolu bozmaa»,- dedi Evgeniy Tukan.
Küüyü başı urguladı, ani yolların düzülmesi i kuvetlerin baş davaların birisi. Planda bu yıl taa bir yol düzmää.
«Hep ölä bu yıl koyulu plana taa bir yol yapmaa. Birleştireriz iki yolu Novaya sokaanda ara sokaa İvan Mitulun sokaadan. Orada brusçatka koyacez, neçinki büük yaamurlarda bölä yolda asfalt yıkanacek, bunun için brusçatka yapacez»,- annattı Küüyün primarı.
İki yolun düzülmesinä harcanacek 1 million 400 bin ley. Da bu paralar yol fondundan iki yılın içindä ödeneceklär.
Moldovanın hem Gagauziyanın en mekalı haberleri GRTnın Telegram kanalında!