CK«GRT» Komradın yaşayanı Dmitriy Mihaylov danıştı. O komşularlan problemayı savaşȇr çözmää, angıları kendi ev çorbacılıında hayvannarı tutȇrlar. Bu beterä yakında yaşayan insannarı kötü kokular raatsız ederlär. Soruş muniţipal oturuşunda açıklandı.
Komradın yaşayanı Dmitriy Mihaylov, angısı Yujnıy ara sokaanda yaşȇȇr, çekim grupamıza annattı, ani komşusu kendi evindä hayvannarı tutȇr, bu beterä dolaya kötü kokular daalȇrlar. Yakında yaşayan insannar birkaç yıl sıravardı türlü kurumnara danıştılar, ki problemayı çözmää. Dmitriyin laflarına görä, kokular hem hayvannarı tutmak başka taraflar komşuları raatsız ederlär, var olan durumu birtürlü olmȇȇr çözmää.
«Beni Komradın muniţipal nasaatınа yolladılar, gittim, onnar geeri ANSAya yollȇȇrlar. Nasaatın başı söleer, ani o adam çok hayvan tutmarsa, zarar yok. О onnarı keser da pavilyona götürer, bölä cuvabı kablettim. Butakım düşmeer yolsun. Bu arada hepsi çobannar yaşȇȇrlar, ama hepsi hayvannarı başka erä geçirdilär başkalarına zarar getirmemää. Koku pek kötü, bän da isteerim raat yaşamaa, neçin bütün yaşamamı kaçtım»,- annattı Dmitriy Mihaylov.
Muniţipal nasaatı başı Georgiy Vlah açıkladı, ani primariya bu durumda yok ne yapsın, çünkü var kanon, angısı evdä tutmak hayvannarın sayısını, eri hem sanitar normalarını kontrol eder. O belli etti, ani Dmitriy Mihaylov lääzım maasuz izmetlerä danışsın, kimin hakları var bu uuru kontrol etmää.
«Kanon normaları var, kendi vakıdında muniţipal nasaatı onnarı kabletti, sade onnar işlämeerlär. Bizim seslerimizdän bişey diişmeyecek. Bän düşünerim, ani o maasuz kurumnara düşer danışsın. Bilmeerim, kimin bu işi, ama er ANSA kurumun, neçin bizä doorudȇrlar adamı»,- nışannadı Georgiy Vlah.
Komratta ANSA teritorial ofisindä Tukan Mihaila danıştık. O bu işin prinţipini açıkladı.
«Yaşayannarın tarafından varsa aalaşmaklar, inspektorlar çıkȇrlar adreslerä dä muniţipal nasaatınnan kararlı kurallara görä hayvannarın koşullarını kontrol ederlär. Er biz kanona karşı gitmeklerini belli edärsäk, 158- ci statyasına görä cezalȇȇrız. O erä çıkıp, durumu notalȇȇrız, varsa kanondan dışarı yasaklar, çorbacıları ceza bekleer»,- urguladı Tukan.
Мihail Tukan sayȇr, ani hayvannarın sayısı, individuallı lääzım olsun, durumu esaba alarak, deyecez komşulardan uzak olarak hem başka faktorlar.
«Kanona görä, insan evdeki çorbacılıında 5 domuz hem onnarın pırçellerini 6 aylık olunca var nicä tutsun. Biz annȇȇrız, ani Komrada deyni, er herkezi evdä 5 büük domuz tutarsa – bu normal diil. Bän sayȇrım, ani kuvetlär var olan durumdan çıkşı lääzım bulsunnar»,- ekledi Mihail Tukan.
«Veterinar çalışması» hem evdä çiftçilik hayvannarını tutmak sanitar normaları devletin kanonnarına görä, hayvannar için cuvapçılıı çorbacı götürer. Biz ona cuvap için danıştık, ama komentariyadan atıldı. Hayvannarı sanitar normalarına karşı tutmak yaşayannara deyni: 900- 1500 leya kadar ceza koyulȇr, üridik insannarına 3000 leydän – 4500 leya kadar tutȇr.
Moldovanın hem Gagauziyanın en mekalı haberleri GRTnın Telegram kanalında!