Küçük Paskellä – pravoslav insannarında ölülerin Paskellesi. O geler Büük Paskellenin ikinci aftasının pazertesinä. Gagauzlar bu günä özelliklän hazırlanȇrlar. Arnaut İvan hem Mariya aylesindä Küçük Paskelledä sofra konulȇr hem mezarlıklara gidiler.
Komrat kasabasının yaşayanı Маriya Arnaut Küçük Paskelleyä özelliklän hazırlanȇr. İmekleri masa için yapȇr, geçinmişleri anmak için adetleri kullanȇr. Ayledä sevilän temel imäk bu gün için – o salnik kuzu ceerindän, söleer Mariya Arnaut: «Açan Paskellä geler, kuzular körpä, prapuraları da diil kalın. Alȇrım iki ceer, var eşil suan, petruşka hem greçka, da koyȇrım onnarı buz dolabına».
Yımırtalar Küçük Paskellä için Arnaut aylesindä başka-başka renklerä boyanȇrlar. Boyalı yımırtalar ölülerdän dirilmeyi hem Eni yaşamayı göstererlär. Onnarı Mariya Arnaut yortuya karşı hazırlȇȇr.
«Yımırtayı çıkararkan, koyȇrsın yapracıı. Yapışȇr yımırtaya, orada kuruyȇr da sora açan boyȇrsın onu, eri kalȇr boyanmadık biyaz, kalan eri boyanȇr»,- Mariya Arnaut söleer.
Ölülär için pomana vermäk sırasına Paska, yımırta, tatlılık, peşkircik, mum girer. Onnarı büüklerä yada küçüklerä vererlär ölülerin cannarı için.
«Lääzım koymaa bir şişä su, şarap, günnük hem günnük tütücää. Bir testä mum, yımırta da örtecez. Paskayı kolaç basmasına baalȇrız»,- Mariya Arnaut söleer.
Butakın hazırlanmaklar derin inanmayı hem saygıyı dedelerä gösterer. Gagauz kulturasında hepsi bu adetlär maanaylan hem ayleyä sevgiylän dolu.
Avtor: S. Dimitroglo, operator: S. Georgiev, montaj: M.Kazaku
Moldovanın hem Gagauziyanın en mekalı haberleri GRTnın Telegram kanalında!