Yaz kanikulların karşısında uzmannar teklif ederlär vatandaşlar çok dikkat olsunnar hem bilsinnär lääzımnı kuralları göllerdä bulunarak. Bu uurda en pek dikkat uşakları gözletmää lääzım, etişmemää deyni kötü olaylara.
Yaz-gözäl zaman, uşakların dinnenmäk vakıdı.Ama bu zamanda ana-bobalara dikkatlıı doorutmaa lääzım uşaklara, nışannadı Gagauziya Hatalı olayları Bakannıın uzmanı Ruslan Mazurenko: «Uşaklar taa sık yalnız evdä kalȇrlar, da onnarın ardlarına lääzımnı gözletmäk yok. Uşaklar göllerä giderlär, kayıllıksız, kontrolsuz. Su içinä girerlär,üzerlär, tutmayarak lääzımnı kuralları. Kimär sıra onnarın yaptıkları var nicä belalara getirsinnär».
Uşaklar lääzım göz altında bulunsunnar hem herzaman üüredilsinnär nasıl lääzım kendilerini götürsünnär göllerdä, olmasın deyni türlü kötü işlär hem korkular, nışannadı uzman.
«Siz şansora bulunarsaydınız göldä dinnenmektä uşaklarlan, olunuz dikkat,bakınız onnarın ardlarına, oynamasınnar su boyunda, köprülär üstündä, kendibaşına lodkalarda üzmesinnär»,- dedi Mazurenko.
Yılın çeketmesindä Moldovada buulmuş 4 uşak. Geçän dinnenmäk günnerindä, Ştefan Vodȇ dolayın,Volontir gölündä buulmuş 2 kardaş 10 hem 11 yaşında. Uzmannar nasaat ederlär uşakları brakmamaa gözletmeksiz, yasak etmää oynasınnar göl boylarında. Hatalı olay belli olduysa,danışmaa 112 izmetinä.
Moldovanın hem Gagauziyanın en mekalı haberleri GRTnın Telegram kanalında!