D.Mavrodi adına liţeyi enilendi. Eniliklerin bir payı anaların-bobaların hatırınnan oldular. Onnar MPay devlet ödemekleri sistemasından kendi istediklerinä hem kuvetlerinä görä üüretim kurumuna para geçirerlär. Liţeyin öndercilii sä kararlȇȇr, angı uura bu paraları harcamaa hem netürlü proektleri giriştirmää üüretim ortamı taa islää olsun deyni.
D.Mavrodi adına liţeyindä anaların-bobaların yardımınnan eni proektlär giriştirildilär. Burada iki hayatta remont yapıldı. Zamandaş tavannarı yaptılar hem eni şafk sistemasını geçirdilär. Bu yapıldı anaların-bobaların hatırınnan, urguladı liţetin başı M.Bolgar. O çizgiledi, ani hayatlar taa uygun hem yakışıklı oldular. Da onun bakışına görä üürenicilär kendilerini okulda taa komfortlu duyȇrlar.
«Biz karşılȇȇrız MPay devlet ödemekleri sistemasını hem sevineriz ona, ani analar-bobalar kendi istediklerinä hem kuvetlerinä görä bizä yardım ederlär. Esap alȇrım, ani MPay sistemasında taa çok okul peydalanȇr. Da bu okulları diiştirmää lääzım, üüürenicilär için zamandaş koşulları kurmaa kolaylıı verer»,- urguladı liţetin başı Maksim Bolgar.
D.Mavrodi adına liţeyindä üürenän uşakların anaların-bobaların 90% MPay platformasını kullanarak, bu liţeyä para vererlär. Liţey başı M.Bolgar urguladı, ani hepsi olȇr kanona görä hem Üüretim ministerliin kararına görä. Nereya hem nekadar para harcanȇr okul administraţiyası analara-boblara toplantılarda açıklȇȇr.
«İkinci yıl şansora MPay sisteması aşırı analardan-bobalardan para kablederiz. Hep ölä Bakannık komiteti bizi destekleer. Biz türlü proektleri yaşamaya çıkarȇrız. Yısıtmak sistemasını enilettik, okul ortamını diiştirdik. Esap alȇrsınız, ani hayatlarımız artık maavi diil, niceydilär sovet vakıtlarından beeri, ama onnar türlü renktä, zamandaş dekorlan. Biz isteeriz, ki üürenicilerimiz havezlän okula gelsinnär üürenmää hem vakıdı geçirmää»,- urguladı liţetin başı.
Geçän yıl regional kuvetlerin yardımınnan birinci katta, neredä başlankı klaslar üürenerlär, erleri enidän döktülär. Diişmeklär başka erlerdä dä oldular. Bu sayıda okulun sport salonu hem imäk odası. Tutturȇrlar liţeyi erindeki kuvetlär dä. Bundan kaarä liţeyin öndercilii türlü diil devlet kurumnarın proekt konkurslarında pay alȇr. Üüretim ministerliin açıklamasına görä 2024-cü yılın iyun ayından 2025-ci yılın oktäbr ayınadan MPay ödemäk sisteması aşırı Gagauz Erinin 5 üüretmäk kurumu analardan-bobalardan finans yardımını kabletti. Bütünnä sayı 366 bin ley kurȇr.
Moldovanın hem Gagauziyanın en mekalı haberleri GRTnın Telegram kanalında!