Kıpçak küüyün B.Yanakoglo adına liţeyindä rumın dili hem literaturası kabinetını açtılar. Eniletmää ders kabinetını yardım etti Moldova Respublikanın Hükümeti. Bu proektin baş neeti — kurmaa islää koşulları uşaklar için devlet dilin üürenmesindä.
Kabinetın enilenmesi için verildi 100 bin leydän zeedä. Burada koydular eni masaları üürenicilär için, alındılar kiyatlar, üürenmäk materialları, dolaplar hepsi yazıları tutmaa deyni. Hepsi bunnar yapêrlar derslerin geçirmesini taa zamandaş hem taa kaliteli. Üürenicilär için bölä diişilmeklär diil sade eni interyer, ama taa bir motivaţiya üürenmeyä.
«Saa ol isteeriz sölemää ani bölä yardım oldu bizim klasımıza, ileri dooru hepsi bunnar yardım edeceklär rumın dilini üürenmää».
Rumın dili üürenmesindä yardımnamak büünkü gündä devletin baş neetlerin birisiydir. En önemni,ani uygun koşullar kutulsunnar diil sade kasabalarda, ama küü okullarında da, — dedi Üüretim ministerlii halklar baalantıları izmeti başı İvan Duminika: «Bizim için pek önemni yardımcı olmaa rumın dilinin üürenmesindä, neçinki biz lääzım kaarşı çıkalım üürenicilerä, ayırı 9-cu 12-ci klaslarda, o sebeplän, ani devlet ekzamennarı lääzım versinnär. Ama biz rumın dilini üüreneriz diil sade ekzamennar için, ama lafetmää onda hem ileri dooru üürenmää Kişinövda universitetlerdä».
Uzmannarın laflarına görä, Boris Yanakoglo adına liţeyi bu proektä girdi, çünkü burada uşaklar islää uurda göstererlär kendi bilgilerini hem üüsek çıkışları, nışannadı Gagauziya üüretim bakanı Nataliya Kristeva: «Alıp esaba nekadar meraklanȇrlar burada üürenicilär dillärlän hem görüp onnarın çıkışlarını regional hem respublika olimpiadalarda, kabledildi karar, ani maasuz Boris Yanakoglo adına liţeyindä rumın dili için kabinet enilensin. Biz bulunduk olayda, angısında üürenicilär halizdän gösterdilär, ani dili bilerlär onnarın yaşı için. Önce testlarda da onnar kendi bilgilerini islää uurda açıkladılar».
Enilenmiş kabinet olacek liţey için önemni, çünkü burada uşaklar ekzamennerä hazırlanaceklar hem lafetmäk becermeklerini da ilerledeceklär, urguladı B.Yanakoglo adına liţey başı Natalya Uzun: «Bizä deyni bu olay pek önemni, bakmayarak, ani okulumuza çok yıl artık, bizim uşaklarda var kolaylık işlemää, da Natalya Nikolaevnanın teklifinä görä hem üüretim ministerliin hatırınnan bizdä kabinet enilendi. Şindi üürenicilär taa islää koşullarda olaceklar, düşüneriz,ani taa tehnika da gelecek — hepsi bunnar yardım edeceklär uşaklara üürenmää dili, hazırlanmaa ekzamennerä nicä 9-cu ölä da 12-vi klaslarda».
Üüretim uurunda uzmannar sayȇrlar, ani enilenmiş kabinet rumın dili üürenmesi için o taa bir adım açan Gagauziyada kurulêrlar kaliteli hem uygun koşullar okullarda.
Moldovanın hem Gagauziyanın en mekalı haberleri GRTnın Telegram kanalında!