“Üüretim Gagauziyada: Sonuçlar, başarılar, neetlär” regional pedagogika konferenţiyasının süresindä belli oldular Gagauziya liţeylerin 2025-2026-ci üüretim yılın iş çıkışları. En ii kurumnar kablettilär diplomnarı hem para premiyaları üürenicilerin üüsek çıkışları için. Taa derindän Nat. Andrieş.
İlk eri Gagauziya liţeylerin arasında ii çalışması için reytingta pay etti iki kurum. Komrat kasabasının Gavril Gaydarjinın adına teoretik liţeyi, angısında 100 proţent çıkışlar hem 57 proţent bilgi kalitesi için bakalavra hem 100 proeţnt çıkışlar gimnaziya ţiklası ekzamennär için. Liţey üürenicileri kazandıalr 8 priz erini respublika olimpiadalarda. Aktiv katıldılar bilim proekt işinä. Hep ölä liţey katılardı gagauz dili hem literatura olimpiadalara, üüretim forumlarda pay alardılar hem genç uzmannarı işä alardılar. Kurumun başı Olga Kara şükür etti kolektivin çalışmasının üüsek notalaması için.
«Kutlêêrım hepsi anaları-bobaları, üürenicileri, üüredicileri hepsi tehnik personalı. Hepsinä iilik hem raatlık.»
Reytingın taa bir enseyicisi Mihay Eminesku adına liţeyi Komrat kasabasında. Liţey 100 proţent çıkışları bakalavra ekzamennerindä kabletti gösterip en üüsek bilim uurunu orta bal da 8 kurdu. Liţeylerın Respublika reytingında kurum 33- cü erdä bulunêr. Liţey aktiv katılêr üüretim forumnara, ilerletti zamandaş üüretim sferasını hem başarılı genç uzmannarı işä çekärdi, nışannadı liţey başı Svetlana Stoynov.
«Saygılı kolegalar, üüredicilär, üürenicilär, analar- bobalar. Şükür ederim sizin çalışmanız için, neçinki siz katılêrsınız okul işinä, dooru giriştirersiniz kendi potenţıalını bizim çıkışlarımızın kazanmasına. İsteerim çok saa ol sölemää başarannarımıza 12 klasın üürenicilerä, angıları şansora kendi fakultetlarında üürenerlär. Onnara çok saa ol neçinki bu yıl onnar üürendilär kendi baş paalılıklarını yaşamaya çıkarmaa.»
İkinci eri pay etti üç liţey- Çadır kasabasının Mihail Guboglo adına liţeyi, Kirsovo küüyün Mihail Tuzlov adına liţeyi hem Kongaz küüyün Suleyman Demirel adına moldo-türk liţeyi. Üzüncü eri da Gagauziya liţeylar çalışmasında reytingta üç kurum kazandı. Komratta Dmitriy Karaçoban adına liţeyi, Nikolay Tretyakov adına liţeyi Kıpçak küüyün Semön Baranovskiy adına liţeyi hem Kazayak küüyün liţeyi. Üüretim bakannıın başı Nataliya Kristeva nışannadı, ani hepsi üüretim kurumnar üüsek çıkışları kablettilär da bu gösterer ani büük iş yapılêr.
«Bu yıl nicä hiç yoktu. Çekettiynän dördüncü erdän birinci erädän. Onnarın aralarında ayırmak 0,5 kurêr. Biz göreriz nicä üüretim kurumnar kalkınêrlar. Annayarak nereyi gitmää hem ii çıkışları kazanmaa.»
Hep ölä ödüllendilär Gagauziyanın gimnaziyaları 2025-ci 2026-ci üüretim yılların çıkışları için. Kurumnar kablettilär diplomnarı para premiyalarını üürenicilerin üüsek çıkışları için, üüredicilerin profesional uuru için hem gagauz dili sferasının genişletmesi için uurunda başarları için.