19 yıl sıravardı Komrat kasabası M.K.Atatürk adına bibliotekasında TD liderin M. K. Atatürkün anması için Türkiye Gençlik hem sport gününä adalı şahmatı turniri geçiriler.
Şahmatı turnirindä pay aldılar sportçular Gagauziyadan,Kaguldan hem Bessarabkadan, nışannadı Komrat kasabası M.K.Atatürk adına biblioteka öndercisi Vasilisa Tanasoglo: «Bu halizdän gözäl bir adet bibliotekamızda oldu, kutlamaa mayın 19-nu Atatürkün anmak gününü hem gençlik hem sport yortusunu. Bu yıl 19-cu turnir, 19 yıl sıravardır biz kutlȇȇrtız yortuyu. Elbetki,ilk günnerdä katılannarın sayısı okadar çok diildi, amma yıl-yıldan onnar zeedelendilär. Bizim öndercilerimiz Ünuz Emre institudu başkanı finans tarafından bizi gözäl destekleer, pek gözäl ödüllär uşaklara olȇr. Bu da bizim gençlerimizi katılmaa havezlendirer».
Bu yıl türnirdä 63 şahmatacı pay aldı. Herbiri onnardan üüsek erleri region, devlet hem halklararası turnirlerindä pay aldılar, nışannadı şahmatı treneri Andrey Çeşmedji: «Burayı katılȇrlar uşaklar, angıları giderlär Evropaya, Dünnää çempionadına. İleeri dooru da türklär kalksınnan yukarı, biz birliktä olalım hem ilerleyeläm lääzım».
Kagul şahmatı merkezi̇ önderci̇si̇ Denis Mokanu nışannadı, ani bölä turnirlär vererlär kolaylık uşaklara kendilerini denemää hem biri-birininnän dostlaşmaa.
«Pek önemni dostluk baalantılarımızı kaaviledelim hem ilerledelim, çünkü MD küçük bir devlet, ama burada çok millet yaşȇȇr. Bu turnirä biz getirdik 5 sportçu 3 yaş kategoriyasında»,— nışannadı Mokanu.
Her yıl TD hederlez ayın 19-da M.K.Atatürkü anmak günü hem gençlik hem sport günü nışannanȇr. 1919-cu yılda TD lideri M.K.Atatürk Samsunda gençlerin önündä söz tutup, interventlerä karşı koymaa teklif eder. Bu danışmak milletin serbestlii için güreşinä hem Türkiye devletinin kurulmasına temel olȇr. Bundan sora bu gün gençlik günü gibi da nışannanmaa başlȇȇr.
Avtor: A. Terzi, operator: V.Kıssa, montaj: İ. Rezuneţ
Moldovanın hem Gagauziyanın en mekalı haberleri GRTnın Telegram kanalında!