Büün, mayın 13-dä kendi duuma gününü peetçi, yazıcı, üüredici, muzey zaametçisi Mariya Mercanka-Kapaklı kutlȇȇr. Mariya İvanovna 75 yaşını doldurdu. O Beşalmada duudu, büün dä burada yaşȇȇr hem kendi halkına izmetini ilerleder. Küçüklüündän ana dilinä canında ayırı bir eri verdi. Gagauzça lafeder, gagauzça yaradȇr, gagauzçayı andırȇr hem onun ilerlemesi için kuvet koyȇr. Bu meraklı insan için taa geniştän sıradakı süjetimizdä.
Mariya Mercanka-Kapaklı yaradıcılık yolunda halkının ecelini açıklamaa kararı aldı. Bu karardan da yıllar boyunca atılmadı. Ama yaradıcılık yolundan kaarä Mariya İvanovna D.Karaçoban adına milli istoriya hem ȇtnografiya muzeyindä işleer. Gelennerä gagauzların eceli için annadȇr.
«90-cı yıllarda kuvedi̇mi̇zi̇ bi̇rleşti̇rdi̇k. Kulturamızı, istoriyamızı koruduk. Onnarı kaybetmää olmaz»,- Mariya İvanovna annadȇr.
Yaradıcılık Mariya İvanovnanın soluu, sesi, halkına hatır hem saygı. Tipardan birkaç kiyadı çıktı: peetlär hem düz yazılar hem büüklär için hem uşaklar için.
«Bu kiyat 2008-ci yıllarda çıktı. Burada hem peetlär, hem düz yazı. Taa bir kiyadım 2015 yılda tiparlandı. Bu da uşaklara deyni»,- o söledi.
Var yaratmalarının sayısında romannar da. Büük yaratmalarında özel eri — gagauz karılarının süretleri kaplȇȇrlar. Çünkü karılar, nicä söleer kendisi avtor, mayıl ederlär. Hep ölä orta erdä halkın istoriyası, kultura, aylä paalılıkları.
«Bän yok nasıl yazmayım analarımız için, karılarımız için. Ruh kaavilikleri mayıl eder»,- Mariya İvanovna annadȇr.
Mariya İvanovna nicä bir çevirici dä işler. Başka dillerdän sevgili avtorlarının yaratmalarını gagauzçaya çevirer. Hep ölä büük saygıylan hem hatırlan kultura, üüretim olaylarına katılȇr. Gençlärlän lafeder, onnara kendi fikirlerini açıklȇȇr, bakışlarınnan paylaşȇr.
«Kuvedimä görä gagauz dilimiz ilerlederim»,- Mariya İvanovna annadȇr.
Gagauz Yeri Üüretim bakannıı Mariya Mercankaya saygısını göstermäk için maasuz konkursu kurdu. 5-ci klastan 12-ci klasa kadar üürenicilär avtorun yaratmalarından kendi bakışlarına görä en meraklı paycazları seçtilär hem annattılar. Bu video-monolog konkursu avtorun yaradıcılık yolunun zenginniini gösterdi hem tanıttı.
Büün Gagauz Yerinin kulturasında Mariya Mercankanın adı özel eri kaplȇȇr. Onun zaameti sä — bir örnek. Örnek, nicä ana dilini sevmää var nicä. Örnek, nicä halkına izmet etmää lääzım. Moldovanın hem Gagauziyanın en mekalı haberleriGRTnın Telegram kanalında!