Patrul poliţiyanın uzmannarı geçirerlär reydları, bakarak, nicä şoferlar yapȇrlar kuralları gezmää yanarak şafklarlan gündüz.
Kural, ani gündüz maşınalarda yanarak şafklarlan gezmää, işleer noyabrinin birindän mart ayın 31-nädän . Da herbir şofer, kullanarak maşınayı, lääzım gündüz şafkları tuştursun, söledi Komrat- Çadır- Lunga patrul izmetin uzmanı Andrey Dimitroglo: «Bu kuralın neeti taa ii görünsün transport, maşınalar arasında aazaltmaa avarya sayılarını da en pek hava koşulların diişmesindä, açan yaamur, kaar, duman. Poliţiya nasaat eder yola çıkarkan, ilkin bakmaa maşınada şafkları hem tehnik halını, esaba almaa hızlılık rejimini, distanţiyayı transport aralarında hem yol kurallarını yapmaa».
İnspektorlar durgudȇrlar maşınaları da şoferlara annadȇrlar, nekadar lääzımnı gezmää şafklarlan gündüz, neçinki bu yıl zamanında hava bozulȇr sık- yaamur, duman hem erken karannık olȇr. Ama şafk verer kolaylık başka şoferlara görmää maşınayı da aazaltmaa kolaylıı urulmaa. Poliţya uzmannarı söleerlär, ani şoferların çoyu kuralları yapȇrlar, ama var öleleri, angıları bozȇrlar onnarı.
«Bilerim, neçinki şindi güz da duman var nicä olsun. Ama unuttum tuşturmaa, pasajiri indrdim da unuttum».
«Kanon ölä noyabrinin birindän aprelin birinädän şafklan gezmää. Bän sovet birliindä duudum da bölä yoktu sade Pribaltikada gördüm. Kimär keret unuduȇrım şafkları koymaa. Neçinki unudȇrım, sora onnarı sündürmää da açan isteerim maşınayı yollandırmaa, akumulätor biter».
«Bilerim, korumak için lääzım, yolda hepsi görünsün. Bän yapȇrım bu kuralı. Şindi ay sade çeketti, savaşacez unutmamaa».
«Bizdä eni maşına, da burada şafk avtomatlan yanmaa çekeder. Biz kanonnarı bileriz, neçinki dumannar hem yaamurlar hem başka havalar».
Ayırı er veriler trasalara hem küü yollarına, neredä avariya riskları taa üüsek neçin ki şafk aaz var. Da burada yardıma gelerlär dronnar, angıları videoya çıkarȇrlar hepsi yannışlıkları. Poliţiya temsilcilerin laflarına görä şafk kullanması maşınalarda gündüz yapȇr transportu taa görümnü yolda da yardım ederlär yok etmää yol razgelemelerini. Kanon bouculara ştraf konulacek nışannadı Andrey Dimitroglo: «Yol kuralların 230-cu statyanın 4 punktuna görä şafk olmarsa maşınada gündüz noyabrinin 1-dän mart ayın 31-nädän bakıler ştraf minimal 300 ley maksmal 450 ley».
Poliţiya danışȇr şoferlara olsunnar yollarda açıkgöz, hızlılık rejimini yapsınnar hem unutmasınnar korumak kuralalrı için, angıları insanın yaşamasını kurtarȇrlar.
Moldovanın hem Gagauziyanın en mekalı haberleri GRTnın Telegram kanalında!