Komrat stadionunda Mediya Futbol liganın üçüncülää keret açılışı geçti. Bu yıl yarışmalarda 12 futbol takımı pay aldı Moldovanın üülen tarafından, onnarın aralarında eni komandalar da var. Açılışın süresindä geçtilär ilk matçlar, onnarın çıkışlarına görä belli oldular favoritlär. Tutturma kendi komandalarını bolelşiklär hem fanatlar geldilär. Kim urdu ilk golları üürendi bizim korespondentımız.
Mediya futbol liganın açılışında musafiirlär hem hazırlayıcılar nışannadılar, ani yıl yıldan meraklık bu yarışmalara büüyer. Komrat küüyün primarın yardımcısı Stepan Kara nışannadı, ani turnir oldu adetçä hem mussafirlerä gözäl futbol gösterer.
«Büün futbol— bu en gözäl hem anılmış sport çeşiti bizim kasabada. Da biz hepsini yapȇrız, ki bu sport ilerlesin»,- Stepan Kara nışannadı.
Futbol federaţiyanın sekretari Sergey Butelskiy nışannadı, ani ikinci keret bu oluşta pay alȇr.
«Bana pek hodullu burada bulunmaa, neredä ii atmosfera, hepsi yarışmanın atributları bakılȇrlar, hava ii, komandalar, bolelşiklär. Bu pek önemi»,- Sergey Butelskiy nışannadı.
Muniţipal sport okulun başı Gavriil Tulba nışannadı , ani ilk matçlardan taa duyulȇr kızgınnık , pofesionalizm hem konkurenţiya ruhu.
«Futbol meydanında geçerlär kaavi oyunnar, uşaklar güreşerlär üüsek uurda, meraklık futbola bizdä büüyer, o yıl yıldan bizdä ilerleer. Biz nicä harızlayıcı komitet, savaşȇrız geçirmää onu üüsek uurda»,- Gavriil Tulba nışannadı.
Bu gün geçti ilk matçlar. Matç Tomay hem Oguzsport komandaların aralarında başarıldı sayılan 1-1, penaltilerä görä 5-2, taradı Oguzsport. Meydanın ikinci payında kubok için güreştilär Kirsovo Mayak hem Asker komandaları. Matç başarıldı sayılan 2-3.
«Biz istedik göstermää kendimizi, da görmää nicä biz oynayacez».
«İlk oyunu geçirdik Oguzsport klubunnan 1-1 sayılan. Penaltidä tarattık».
«Büün geçti ii oyun, bizdä vardı çok gol momentleri. İniţiativa bizim elimizdäydi».
İkinci oyunda meydana çıktı taa iki çift , onnar kendi aralarında belli ettilär ilk turun tarayıcıları. Vişnovka oldu konkurent Kagul komandasına. Onnar başardılar oyunu golsuz, penaltidä sayı 4-2. Galaktika buluştu Konstruktorul Leova komandasınnan. Matç onnarın aralarında başarıldı sayıylan 0-3, taradı musaafirlär Leovadan.
«Dilerim hepsinä taramak, buluşacez gelän pazara, biz ii oynadık».
«Bizdä ilk ofiţial oyun , biz eni komanda, pek ii belli ettik kendimizi, ama çıkışlara görä taa lääzım işlemää».
«İlk oyun kaaviydi hem zordu, diildi pek hazır, taa gireriz oyuna. Büün tarattık, yok bişey».
İlk turun bitki oyunnarı kendi aralarında geçirdilär Kara Beygir takımı Komrattan hem Kongaz. Kaavi matçın süresindä mussafirlär taradılar komratlıları sayılan 3-1. Bu sayılan başarıldı taa bir matç Kirsova hem Betakom takımların aralarında. Taradılar Kirsovo futbolcuları. Turnirin matçları iki ayın içindä geçeceklär. Çempion kuboo tarayacek.
Moldovanın hem Gagauziyanın en mekalı haberleri GRTnın Telegram kanalında!