Çiftçilik uurunda iş ilerleer. İlkyaz yamurlarından sora kimi çorbacılıklarda durum pek islää, ama kimi çiftçilär artık sölerdlär, ani bereket bu yıl zengin olmayacȇk. Üürenmää deyni, nicä işlär hem kendi gözlerinnän kırları, büüntüleri görmää deyni Avtonomiyanın öndercilii, çiftçilik bakannıın uzmannarı meraları dolaşmaa başladılar. Çekettilär Komrat dolayından. Bulundular onnar büün, iyunün 5-dä kırlarda, meyva başçalarında hem tepliţalarda. Bizim korespondentimiz Z.Kanţir hep ölä burada bulundu. O çiftçilerin hem uzmannarın bakışlarını kendi süjetindä açıklayacȇk.
Maksim Dyanov hen Väçeslav Uzun 6 yılın süresindä tepliţalarlan zannatlanȇrlar hem çilek büüderlär. Bu yıl hava belli etti kendidisini bu bölümdä da, ama nicä söleerlär agrariyalar, erlem olmayaydı tepliţa, açık grunnta bu da bereket olamayceydı. Kuraklık hem ayazlar belli ettilär kendilerini meyva başçalarında, kimi agariyalarda bereket hiç olmayacek, kimdä sa olacek ama taa az. Vitaliy Pataramanın çorbacılıında kirez ii halda ama havanın beterinä taa az olacek.
«Ayazların önündä biz yok nasıl karşı dularım, naturaylan baas konmayacan, biz savaştık koymaa tütün puşakalarını, yakmaa ateş, koymaa saman her taraftan, ama kurtaramadık»,- dedi çiftçi.
Semön Navaan hem İvan Mardarın kurumnarında geçmiş yaamurlardan sora durum biraz doruldu . Ama kuraklık hem ayazlar belli ettilär kendilerini ilk gruppanın bereketindä, söleerlär agrariyalar.
«Ne baalı büümnärlän , onnarın kalitesinnän, o pek ii, onnar ilkyazdan gözäldilär, ama ayazların beterinä ekin hem raps biraz zararlandılar. Ama bitki yaamur oldu yakın 65-70 milimetra da durumu diiştirdi. Nicä deerlär insan arasında Gagauziya ekmeklän olacek»,- dedi Semön Novak.
«Yaamur angısı geçti biraz diriltti büümneri, onnar gözäl, umutlanȇrız ani olacek ii bereket, avgust ayınadan olarsa taa bir yaz yaamuru, var nasıl taa ii olsun bereket»,- urguladı İvan Mardar.
Geçän yıl Semön Novakın kurumunda diktilär eni baa Moldova çeşitlerindä üzümneri. Büüderlär kurumda Evropa tehnik çeşitrlerindä üzümneri, çünkü var kendi şarap kurumnarı. Kurumda şavaşȇrlar kullanmaa eni tehnologiyaları , ki kuraklık yıllarda kabletmää ii bereketi.
«Geçän yıl kablettik pek küçük bereket, bu yıl bakaceez bu yaamurlar lääzım durumu diiştirsinnär».
Kirsovo küüyündä kurumnarda durum diil hererdä ii. Kimi çorbacılıklarda ilk gruppanın bereketi pek kötü halda bulunȇr. Kuraklık hem ayazlar braktılar kendi izlerini onnarda. Bir payında durum taa ii.
«Ekin bulunȇr ii halda, bakarak büünkü kuraklaa, angısı bu vakıdadan vardı hem ayaz, göreriz ani o yaralandı, ama çıkışlar var».
Nicä söleerlär insannar arasında bir günü kırda kaçıracan bütün yılı kaybedecän. Buna bakmadaan agarariyalar savaşȇrlar zor yılın koşullarına görä hepsi lääzımnı operaţiyaları kırda yaptılar, Durum ilk gruppanın büümnerinnän taa ii Kongaz küüyündä. Komissiya bulundu Anatoliy hem Nikolay Ormanjının kurumnarında.
«Büümnerin durumu biraz diil ii, biz biraz kuraklaa hem ayazlara düştük. Büümnär büünkü günä ii halda bulunȇrlar»,- çizgiledi Anatoliy Ormanji.
Meraları dolanmadaan sora Bakannık komitetin başın yardımcısının laflarına görä, umutlar vardı almaa 4 ton bereket, ama konuştuynan uzmannarlan bu sayı indi üç tona.
«Bän sandım. ani agrariyalar kebledeceklär 3 ton, amma annadım, ani bereket olacek taa iisik», — nışannadı İlya Uzun, Bakannık komiteti başının yardımcısı.
Başkan işini götürän bakanıın başı İvan Kolioglo sayer, ani agarariyalar kabledeceklär orta bereketi hem onnar yaperlar hepsini ki çiftçilik ilerlesin.
«Bulunduk Komrat dolayında, tepliçalarda, meyva başöalarında, kırlarda. Gördük, ani çocuklar savaşȇrlar, ki bereket ii olsun», — söledi Kolioglo.
Agrar bakanı Sergey ibrişin hem GHT deputatı Valeriy Manastrlı , nışannadılar ani diil hepsi kurumnarda durum ii, var te onnar da kimdä bereket 60-70 proţenda zararlandı.
«Burada pek becerikli insan , diil hererdä bölä bereket var. Biz çalışacez onnara yardım etmää»,- nışannadı agrar bakanı Sergey İbrişim.
«Bän diil ilk keret kontrol ederim çiftçilik bölümünü. Var ii durum da kimi kırlarda»,- Valeriy Manastırlı GHT deputatı, söledi.
Bu yakınnarda komissiya plannadı bakmaa Çadır hem Valkaneş dolayların meralarını.
Moldovanın hem Gagauziyanın en mekalı haberleri GRTnın Telegram kanalında!