Orgeev kasabasında geçti boks çempionatı sport okulların hem klubların aralarında. Yarışmalarda pay aldılar üniorlar. Sportçuların aralarında avtonomiyanın üç dolayından boksörlar da pay aldılar.
Komrat muniţipal sport okulun komandasına girdilär boksörlar sport liţeyindän. Sport okulun üürenicisi Elif Nägu kazandı ilk eri. Nicä nışannadı trener Şerali Turgunov, kaavi konkurenţiyada Elif taradı hepsi düüşlerini da kazandı hakı tanıttırmaa devleti Evropa çempionatında Moldovanın takımınnan.
«Biz pay aldık miniţipal okulunnan birerdä. Sport liţeyindän pay aldı iki boksör. 21 takımdan biz kazandık 10 eri. Elif geçirdi üç düüş, da başardı onnarı 5-0 sayılan. Gösterdi kendi ustalıını, istemesini taramaa, konkurentlar kaaviydilär, hazırdılar. Ama buna bakmadaan, o gösterdi karakterini da taradı ilk eri»,- nışannadı trener.
Nicä nışannadı Moldova çempionu Elif Nägu, taramak diildi kolay, çünkü konkurentlar da üüsek uurda hazırdılar.
«Bu yarışmalar geçtilär üüsek uurda, soperniklär kaaviydi, iidilär. Hepsi soperniklärlän geçirdim üç düüş da taradım onnarı. Hepsinä onnara etişmedi soluk, onun için bän oldum taa kaavi da taradım»,- söledi sportçu.
Takımnarın aralarında beşinci eri kazandı Moldova çempionatında Çadır sport okulu V. Patapov adına. Pay alannar üüsek uurda düüştülär, da getirdilär okulun kumbarasına sıradakı ödülleri. Çempion oldu Ȇduard Papazoglo, ikinci erdä Dmitriy Marinov, Andrey Arnaut. Üçüncü oldular Vasiliy Buzayji, Andrey Kurdoglo. Üüsek uurda tanıttırdılar Valkaneş sport okulunu İgor Petkunun üürenicileri, kazanıp beş ödül. Gümüş ödülcüsü oldu Artur Onofrey, bronz ödüllerini kazandılar İgor Petku, Sergey İnje, Georgi Pavlioglo, Sergey Uzun. Hepsi devletin çempionnarı tanıttıraceklar Moldovayı Evropa yarışmalarında, angıları geçeceklär kirez ayında Serbiyada.
Moldovanın hem Gagauziyanın en mekalı haberleri GRTnın Telegram kanalında!