Kişinöv kasabasında geçti Moldova çemionatı şahmata uurunda 8 yaşınadan sportçuların aralarında. Yarışmalarda pay aldılar 63 sahmatisti bütün devlettän. Onnarın aralarında sportçular regional şaşki-şahmata okulundan.
Moldovanın ȇkonomika akademiyasında, geçti devlet çempionatı şahmatada, neredä belliettilär öempionnarı 8 yaşınadan uşakların aralarında. Nicä nışannadı Şahmata federaţıyanın genel sekretarı Valeriy Koadȇ, bakmadaan ona ani oynȇrlar en küçük sportçular , patriyalar merakliydılar, adımnarda düşünüklüydü.
«Oynȇȇr bütündän 63 uşak, 8 yaşınadan, hepsi şahmatistlerin var razrädları, geografiya pek geniş, pay alȇrlar uşaklar Kişinövdan, Tiraspoldän, Kauldan, Komrattan, Floreştan. Çok dolay, ne bizi sevindirer. Şahmatalar oldulşar taa anılmış, çok ana boba annȇr, ani läzım zanaatlanmaa bu sportlan»,- nışannadı Şahmata federaţıyanın genel sekretarı Valeriy Koadȇ.
Tuturdular sportçuları onnarın trenerları hem analar- bobalar. Regional şaşki hem şahmata okulunu tanıştırdı 6 sportçu. Notaladı onnarın oyununu sport okulun başı İvan Velikoglo: «Kızlarda yarışmalar başarlandılar, onnara deyni bu ii becermek, ilk bu- psihologiya tarafından hazırlanmak, ilerki yıllara, biz umutlanȇrız ani olacek taa ii çıkışlar, bu iş için işleeciz. Bu iş için açtık okulu. Uşaklar pek beenerlär. İİ oynadı İlya Bolgar, Stançev Makar, en küçüktü 6 yaşında».
Şahmata trenerı Mihayıl Groza urguladı, ani pay alannarın aralarında avrdı uşaklar, angıları ilk keret denerlär kendi kuvetlerini bölä uurda.
«Konkurenţiya büük, bän getirdim bir uşak, ilk keret pay alȇr çempionatta, ileri zanaatlanardı kendi bobasınnan, soram aldım onu da bir iki günün içindä, hazırladım onu. O güreşer priz eri için»,- Mihayıl Groza urguladı.
Nicä nışannadı, bir pay alanın anası, o seviner, ani onun oolu pay alȇr bu yarışmalarda.
«O ani bizi teklif etti Moldova çempionatına, biz sevineriz, burada oynȇrlar kaavilär, biz hodullanȇrız bununnan, geçän yıl o oldu 10 cu, dört yaşındaydı, bu yıl üçüncü».
Güreştilär priz erleri için devletin en küçük şahmatistleri , angıalrı kendi erlerindä kazandılar ilk erleri. Çoyuna bu yil uydu kaldirmaa kendi reytingını hem çıkmaa finala. Nicä nışannadılar uşaklar, konkurenţıya kaaviydi, partiyalarda zordu.
«Bän ii oynadım partiyaları, geçti islää, taradım orada».
«Açan benim kardaşın gidärdi şahmatalara, bän da başladım gezmää da beendim».
«Tarattım 7 patiyaya ayakın, bana etişmedi kuvet».
«Edi partiya dokuzdan taradım, bana biraz zordu. Taradım».
«Taradım dört partiya, beş tarattım, çünkü kaavi oyunculardı».
«Oynadım 9 partiya, hepsini taradım, vardı çocuklar üçüncü razrädta».
Çıkışlara görä taraycılar kablettilär kubokları, doplomnarı, kim da olmadı çempion baaşışlandılar diplomnarlan pay almak için. Hederlez ayın 8-dä belliedeceklär en kaavileri büüklerin aralarında, angıları tanıştıraceklar devleti halklarası arenalarında.
Moldovanın hem Gagauziyanın en mekalı haberleri GRTnın Telegram kanalında!