Moldovada geçer aaraştırmaklar insannarın yaşamak koşullar için. Onu Milli Statistika bürosu Hederlez ayın 13-dän Kirez ayın 2-nädän geçirecek. Bu programma devletin Evropa standartlarına uymasını gösterecek.
Soruşturmak geçer neetlän, ki insannarın, angıları 16 yaşından büük kazanç hem yaşamak koşullarını belli etmää. Uzmannar yaşayannarın bilgilerini kazanç , yaşamak, iş, üüürenmäk, saalık hem vaarlık için üüreneceklär.
«Milli Statistika bürosu her yıl busoy aaraştırmakları geçirecek. Soruşlar hem anketayı denemäk seftä deneyeceklär 2026 yılda. Bu yapılȇr, ki heryılkı statistika aaraştırmakları başlamaa. 2027 yıldan onnar olaceklar her yılın ikinci payında»,- haberleer MD Milli Satistika Bürosu.
Bu programayı başlamaa deyni, Milli Statistika Bürosu ilktän uzmannarı üüretti hem hazırladı.Seminarda 50 intervju alıcısı hem 10 kontrolör katıldı. Proektin baş neeti — halkın soţial hem ekonomika durumunu belli etmää hem en önemni sorunnarı açıklamaa. Yaşayannarın bakışları bu aaraştırmak için birkaç bölümä payedildi. Bir pay insan bu soy anketalara şüpeli bakêr. Başka insannаr düşünêr, ani bu türlü bilgilär devletin hem halkın gerçek sorunnarını taa ii belli etmää yardım edecek.
«Elbetki lääzım. Neçinki insana büün zor yaşamaa. İlkin, yok iş, hepsi kapanȇȇr. Hem bän sanȇrım, ki her üürendiynän insandan onun yaşamak durumunu , beki nesoysa diişilmeklär ii tarafa olacek. Kuvetlär insanı lääzım işitsinnär ».
«Bilmeerim , alelem lääzım. İnsan nicä yaşardı – ölä da yaşayacek».
«Bilmeerim , bana kalsa diil lääzım. Sansın bişey ii olmayacek bundan».
« Olacek mı bundan fayda? Onnar geçirerlär bu aaraştırmakları , ama insan hep okadar bet yaşȇȇr. Fayda bundan insana yok. Bilmeerim ne beklemää bu aaraştırmaktan».
«Çok insan parasız durȇr , onuştan sanȇrım, ki lääzım belli etmää o insannarı da buna görä karar kabletmää. Pensionerlar , angıları çok yıllar işledilär, büün parasız yaşȇrşar».
«Sanȇrım, ki diil lääzım bölä aaraştırmaklar. Neçin? Neçinki ne için insannar lääzın annatsınnar nicä onnar yaşȇȇrlar hem ne iyerlär. Kuvetlär ölä da bileer nicä insan yaşȇȇr».
« Benimcä, var nicä soruşturmaa, ama en önemni fayda bundan olsun, ani insan makarki küçük yardım kabletsin».
« Sanȇrım, ki büünkü gündä bu aaraştırmaklar diil aktual, neçinki ölä da belli, ki Moldova Devletimiz fukaarılıkta yaşȇȇr. Gençlär Evropaya işlemää giderlär, üürenmää da hep orayı».
« Her bundan sora insanın soruşlarından hem nevoyalıından bunu yapardılar- çıkış başka olaceydı».
« Bu diil prost. Yaşayannar lääzım vergileri ödesinnär» .
«Nekadar taa çok insan onnarı ödeyecek hem gösterecek kendi varlıını , okadar yaşayannar da taa zengin olacek da beki pensiyaları daa büüldeceklär ».
Milli Statistika Bürosu çizgeledi, ani bu aaraştırmak, Moldovanın 2025–2029 yılları için Evropa Birliinä katılma Milli Programasında görä yapılêr. Evropa Birliin koşullarına görä, bölä aaraştırmaklar her yıl geçirilsinnär lääzım.2027-ci yıldan bu soruşturmaklar her yılın ikinci payında maasuz geçireleceklär. Gelecektä toplanan bilgilär var nasıl kullanılsınnar, ki devletin soţial durumunu açıklamaa.
Moldovanın hem Gagauziyanın en mekalı haberleri GRTnın Telegram kanalında!