Mardın 1-dän 2026 yılda Moldovada doktorlar hasta durumu listesini esanatate.gov.md. elektron sayfadan geçirerlär. Paţientlerä lääzım olmayacek başka kabletmää yaprak dokumentleri.
Hasta durumu için listelär doktorlarlan sade elektron formatta yapılaceklar, ki yapraktan dokumenti kabletmää deyni geeri dönmemää. Nicä nışannadı aylä doktoru Rodika Robu , bu enilik oldu nicä bir önemli adım hem mediţina uurunda işleyennerä, hem insana da , angıları busoy dokumenti kabletmää isteyeceklär. Onun laflarına görä , elektron formada geçmäk bütün proţesi hem sistemayı ilinnedeer , taa zamandaş hem raatlı onu yapȇr.
Rodika Robu aylä doktoru, söledi: «Bu enilik verer bizä bir fayda. Kabletmää deyni bu dokumenti çok vakıt harcanardı — burayı girer registraţiya da, yapraklan iş, kompyuterlän iş dä. Şindi, deyecez, bir -iki minutta reţept var nasıl yazılı olsun, hasta durumu için listelär verilsin hem ilerlensin».
Doktorun laflarına görä, bu enilik diil sade dokumentin verilmesini ilinnedecek, ama paţientlerin bakmasını da kaavileştirecek.
« Bän sanȇrım bu yapılı , ki varsa paţient , angısı oya alışȇr ayırı hastalıklardan, kolayı olsun başka speţialistlerdä da bakılmaa, diil sade aylä doktorlarda. Ozaman var nasıl görmää onun dinamikasını , lääzımsa yollamaa onu 3-cü ilaçlamanın uuruna. Onuştan , düşünerim bu kararlandı ilinnik için hem insannara yardımı üüseltmäk için»,- aylä doktoru nışannadı.
Yaşayannarın fikirleri bu soruşta birkaç paya payedildilär. Çoyu kayıl oldular bu formatlan,açıklayarak onun ilinniini. Öbürlär sayȇrlar, ani tehnologiyalar yardımcı olaceklar aazaltmaa yapılma dokumentleri. Ama var onnar da, kim taa bölä diişmeklerä diil hazır.
«Kayılım, bölä olacek taa ilin. Neçin? Neçinki insan lääzım olmayacek kaçınsın hasta durumu listelär için — kapamaa onu, açmaa, orada o sistemada bütün informaţiya olacek. Bunun için var onlayn , ki biz işleyelim gözäl, hızlı hem vakıdında».
«Türlü tehnologiyalar bizim vakıtta faydalı geçerlär. Buradan azalȇrlar olaylar, açan bu dokumentin aslı olmayan kopiyasını yapsınnar yakışȇr. Onuştan olacek çok ii hem çoktan lääzımdı bu yapılsın».
«Gençlerä deyni ilin , ama var ihtär insannar , angıları yapamayaceklar onu elektron formatta. İhtärlar sorȇrlar başkalarından yardım , söleyerak , ani ucunu bulamȇȇrlar telefonnarda, elektron poçtada».
«Bana geler olacek taa raat , neçinki lääzım olmayacek gitmää işä, getirmää hasta durumu için listesini. Sade bölä 21-ci asirdä».
Bakmayarak ţifra formatına geçmeyä, lääzım olarsaydı yaşayannara yakışacek verilsin kiyatta tiparlanmış hasta durumu için listesi dä, nışannadı aylä doktoru. Bu variant yapılacek onnara deyni, kim taa becermeer ţifra sistemalarını kullanmaa yada bu uurda onnarda kimi zorluklar var.
«Açan var lääzımnık , biz var nasıl insana hasta durumu için listesini yaprakta da verelim , her paţient inanmarsa, ani o onda vardı. Açan biz ellerinä vermeeriz, onnar şaşȇrlar. Ama problema yok, istärseydilär, biz vereriz onnarın ellerinä tiparlanmış listeyi dä»,- nışannadı doktor.
Aklınıza getireriz, ani MD mart ayın 1-dän hasta durumu için listelerin verilmesi elektron formatına geçti.
Moldovanın hem Gagauziyanın en mekalı haberleri GRTnın Telegram kanalında!