Kongaz küüyün V.Topal adına gimnaziyasında açıldı «Gagauz Korafları» muzeyin eni odası, muzey 2019 – cu yıldan çalışȇr, şindi muzey çalışannarında var kolaylık taa da çok eksponat toplamaa. Açılışta bulundu Polina Barbova.
İlktän ideyaylan açmaa muzeyi üürenmäk kurumunda çıktı Kongaz küüyün 3 – cu okulun ȇks – direktoru , şindi biologiya hem himiya üüredicisi Olga Çebanova. Çalışıp üürenmäk okulun öndercisi, taa 1980-ci yıllarda Olga Petrovna çeketti toplamaa materialları hem da ȇksponatları.
«Biz topladık informaţiyaları ilk başarannar için, aylelär için, kolhozlar için, vojatalar için, artȇkovţalar için, Afganistan için hem da taa çoyu başka materialları. Orada var meraklı evelki patretlär dä. Örnek gibi « Краткая история гагаузов с. Конгаз» albomu, hep ölä var patretlär, angıları islä korundular küçük uşaklarlan hem başka meraklı işlär»,- nışannadı Çebanova.
Kongaz küüyün V.Topal adına gimnzaziyasının öndercisi Mariya Arnaut durgundu o ȇksponatlarda, angılarını barabar nicä üüredicilärlän, ölä da üürenicilärlän yaptılar.
«Birkaç yıl geeri bizä geldiydi bu ideya. Biz pay aldıdık gagauz dili koruması hem genişletmesi toplantısında, da lääzımdı nesä yapma açık, gözäl hem meraklı. Biz naasat ettik bizim üürtenicilerä, ki onnar peetleri kursunnar. Da, te hepsi peetleri topladık bu kiyatçaazlara, herbir uşaan peeti, ne o üürendi. Herbir sayfa söleer bir üürenici için»,- Mariya Arnaut annattı.
Kongaz küüyün V.Topal adına «Gagauz Korafları»muzeyin başı Marina Grozdeva çizgiledi, ani bütünnä kollektivlän çalıştılar üürenmäk okulun ilerlemesi için.
«Geçirdik hepsi ȇksponatları bu odaya. Bizä hepsi yardım etti, neçinki kollektivdä 30 — dan zeedä üüredici çalışȇr. Hiç kimsey bir tarafta kalmadı. Getirdik, pakladık, erleştirdik ȇksponatları»,- Marina Grozdeva çizgiledi.
Büünkü günä, Kongaz küüyün V.Topal adına gimnzaziyasının muzeyindä bulunȇr yakın 500 ȇksponat. Mariya Arnaut çizgiledi, ani tezlä vakıtlarda plannadılar barabar üüredicilärlän hem üürenicilärlän toplamaa yakın bin ȇksponat. Her gün üürenmäk kurumuna geler 355 üürenici.
Moldovanın hem Gagauziyanın en mekalı haberleri GRTnın Telegram kanalında!