Kongaz küüyün «Altın Çöşmä» oyun kolektivi hem «Taraf» halk muzika orkestrası kablettilär eni kostümnarı. Baaşışları verdi Gagauziya Başkanı Evgeniya Guţul hem kultura bakannıın başı Marina Semönova.
Eni sçena kostümnarın verilmesi –bu önemni bir olay türlü yaradıcılık kolektivi için, olsa o teatru trupası, oyun grupası yada muzika ansamblisi. Kostümnar göstererlär halk tradiţiyaların zenginnii hem zebellii, sölerlär «Altın Çöşmä» oyun kolektivin azaları.
«Bän pek beendim kostümnarı. Onnarda gözäl uzor hem renki».
«Bän beendim bu kostümnarı, neçin ki onnar bizim gagauz kulturasını göstererlär».
«Bän pek beendim kostümnarı. Onnar pek renkli hem gözäl. Bu kostümdä bän kendimi duyerım uygun hem serbest».
Kongaz küüyün «Altın Çöşmä» oyun kolektivi hem «Taraf» halk muzika orkestrası tanıderlar Gagauziyayi diil sade respublika uurunda, ama dünnäarası konkurslarda hem festivallerdä, bunun için onnara eni kostümnar lääızmdılar, nışanner Kongaz kultura evi başı Matrona Hristeva: «Onnara pek lääzımdı bu kostümnar, çünkü uşaklar büüyerlär, onnarın oyunnarı diişilerlär. Elbetki, lääızm gözäl rubalarlan çıksınnar. Bunun için büük saygıylan şükür ederiz yardım için. Bu diil ilk rubalar, angılarını bizä diktilär. Umudumuz var, ani ötädooru da işleyecez, ani gagauz kulturası ilerlesin».
Her yıl regionun bücetindän veriler para milli kostümnarın dikilmesi için. Kongaz küüyün «Altın Çöşmä» oyun kolektivi hem «Taraf» halk muzika orkestrası için milli rubalar lääızmdılar 2024-cü yılda dikilsinnär, ama o beterä ani vakıt yoktu bu 2025-ci yılda yapıldı, nışannadı Gagauziya başkanı Evgeniya Guţul. O urguladı, ani Kongaz kolektivlerinä 30 milli kostümu verildi.
«Onnara lääızm diiştirmää zaman geçincä bu milli kostümnarı. Biz primarlan, hem kultura bakannıınnan barabar geçän yıl Kongaz küüyün uşaklarına, angıları çok gözäl oyneerlar türkü çalerlar, onnara 30 komplekt verdik eni gözäl milli kostümnarı. Bu yılın biz başka küüyüleri da koyduk. İsteerim sölemää, ani herbir küüyüyä, neredä var kolektivlär savaşacez yardım etmää,neçin ki uşaklar, açan çok oynȇȇrlar, kostümnarı vakıtlan eski olerlar, koperlar da lääzım zamandan- zamana onnarı diiştirmää. Ondan da savaşȇrız bizim gagauz kulturasını uşaklarımız bilsinnär, tradiţiyaları bilsinnär hem da göstersinnär başka insannara da Gagauziyamızı bilsinnär nicä turistik bir eri»,- dedi başkan.
Kongaz küüyün «Altın Çöşmä» oyun kolektivi hem «Taraf» halk muzika orkestrasının azaları eni kostümnarlan giimni birkaç nomer gösterdilär. Milli rubalar olaceklar onnarın nomerların önemni payınnan hem da göstereceklär gagauz halkın koloritini.