Kongaz küüyünün N.Çebanov adına gimnaziyası 105-ci yıldönümünü nışannadı. Üüretim kurumunda yortulu olay geçti. Toplandılar gimnaziyanın üüredicileri, üürenicileri, başarannarı. Üüsek musaafirlär dä vardılar — bakannık komiteti hem GHT azaları. Nicä geçti yortu annadacȇz sıradakı süjetimizdä.
Kongaz küüyünün N.Çebanov adına gimnaziyasının istoriyası 1920-ci yılda yazılmaa başladı. Küülülär çok yıl ona «Sofina şkolası» därdilär. Çünkü bu aylä okulu kurdu. Yıl yıldan okul ilerledi, yapıların sayısı zeedelendi, onun statusu da diişti. Büünkü gün gimnaziyada yakın 280 üürenici üürener. Onnarı 24 üüredici üüreder. Birliktä başarılı olȇrlar.
«Yortumuzu karşılȇȇrız açık üreklän. Sevinerim, ani geldi bizä musaafirlerimiz. Üüredicilär burada pek becerikli işleerlär. Onnar çok kuvet koyȇrlar, ki uşaklarımızı üüretmää»,- nışannaddı Svetlana Düvenjı.
Başkanın komandasının adından baaşış verildi – interaktiv taftası.
«Bu okulu çok islää insannar başardılar. Onnar küüyün başında bulunȇrlar, onnar okulların hem başka kurumnarın öndericileri, onnar deputat oldular. 105 yıl — bu çok mu osaydı aaz mı? Bu koca asir. Bu üzerä, benim bakışıma görä bu yortuyu açık üreklän karşılayalım lääzım, çünkü bu okul bütün avtonomiyaya deyni — örnek»,- nışannadı İlya Uzun, Bakannık komiteti başının ilk yardımcısı.
«Bu şkolada bizim uşaklarımız paalı bilgileri kablederlär. Burada onnarı büük yaşamaya hazırlȇȇrlar. Biz isteeriz, ki bizim uşaklarımız, gençlerimiz Ana topraklarında kalsınnar, burada yaşamaklarını ilerletsinnär»,- urguladı GHT başı Dmitriy Konstantinov.
Üürenicilär üüredicilerinin yardımınnan kendilerini türlü bilgi yarışlarında göstererlär. Bu yıl onnar olimpiadalarda 7 ödül aldılar. Bunun için Gagauz Eri Üüretim bakannıın başı N.Kristeva söledi.
«Taa üüsek başarıları dileerim sizä. Saalıınız olsun, uşaklar havezlän eni bilgileri kabletsinnär. Ko üürenicilerin sayısı zeedelensin. Bilersiniz mi, bu okulda uşakların sayısı iisilmeer. Yıl-yıldan onnarın sayısı yavaş-yavaş zeedelener»,- çizgiledi Nataliya Kristeva, üüretim bakanı.
Yortuda üüredicileri ödülledilär. «Gagauz eri şannı üüredicisi» adını Zinaida Jeju kabletti. Başkanın hem GHT diplomnarını Svetlana Düvenji, Larisa Marinovskaya, Mariya Zavriçko, Svetlana Bessarab kablettilär. Ana okulunu 105-ci yıldönümünnän başarannar kutladılar.
«Yok nicä unutmaa o yılları, açan biz bu şkolada üürenärdik hem dä o üüredicileri, kim bizi üüretti».
«Dostlukta yaşadık, şendik. Yaramazlık ta yapardık. Üüredicilerimizi aklımıza getirderiz. Çoyu artık saa diil. Kiminnän bilä üürendik çoyu başak devletlerdä şindi yaşȇrlar».
«Kızçaazların peliklerini çekärdik. Üüredicilär takazalardılar bizi. Evdä aalaşmazdık. Çünkü aalaştıynan analar-bobalar iki okadar cezalardılar, biz okuda kendimiz islää götürmeeriz deyni».
«Hodulum, ani bän bu şkolada işleerim. Sevinerim, ani beni bu ayleyä kablettilär. Sanȇrım, ani ileri dooru da sevinderecez uşakları. Üüüredecez onnarı taa islää».
«Bu islää bir okul. Kutlu olsun yortular. Pek islää üürenicileri var. Kutlȇȇım onnarı».
Başarılardan kaarä var zoruklar da. Kongaz küüyünün N.Çebanov adına gimnaziyasında yok sport salonu hem yortular geçirmäk için zalası. Ama bu zorlukları çözmäk için ilk adımnar artık yapıldılar. Proekt dokumentleri hazır. Kolektiv umutlanȇr, ani tezlä iş ilerleyecek.
Moldovanın hem Gagauziyanın en mekalı haberleri GRTnın Telegram kanalında!