“Büünkü olay bulunȇr Avtonomiya üürenmäk kurumnarında çok sayıda geçirilän olayların arasında. Bütün devlettä şindi geçirilerlär derslär, angıları Moldovanın baamsızlıının 35-ci yıldönümünä baalı. Hepsi bu olaylar doorudulu ona, ani annatmaa bizim uşaklarımıza Devletimizin, Vatanımızın paalılıını. Onun baamsızlıının önemini”.
Olaya katıldılar istoriya uurunda uzmannar, ekspertlär, üüredicilär hem o olaylarda pay alan marturlar. Filosofiya uurunda doktor, MD Parlamenti ilk çaarışın deputatı Aleksandr Arseni nışannadı, ani bölä olaylar evlad boylarını baalȇȇrlar.
ALEKSANDR ARSENİ filosofiya doktoru, MD Parlament deputatı (1990-1994 y.y.)
“Bölä buluşmaklar bilgileri hem haberleri kabletmesi için önemni, sade bölä buluşmakların yardımınnan üürenicilär, uşaklar aslı bilgileri hem haberleri kablederlär”.
İstorik, profesor hem İ.Kränga adına pedagogika universitetinin istoriya hem geografiya fakultetinin bilim uzmanı Sergey Kataraga nışannadı, ani büünkü üürenicilär lääzım bilsinnär 35 yıl geeri olan olayları.
SERGEY KATARAGA istorik, profesor
“Biz lääzım annayalım, ani yaşȇȇrız hızlı diişilän dünnedä. Her gün peydalanȇrlar başka haberlär hem herbiri onnarı kendiycesinä açıklȇȇr. Diil lääzım unudalım, ani biz bu yıl devletimizin baamsızlıının 35-ci yıldönümünü nışannȇȇrız. Biz savaşȇrız baamsızlıımızı hem serbestliimizi korumaa, burada yaşayan halkların hem millet aazlıkların haklarını korumaa”.
Olaya Gagauziya okullarından gelän 12 takım katıldılar. “ Diri zenginnik” interaktiv olayında uşaklar tanıştılar diil sade istoriya olaylarınınnan, ama devletimizin zengin kultura varlıınnan da tanıştılar, nışannadı Kongaz küüyü S.Demirel adına moldovan-türk liţeyin istoriya üüredicisi Viktoriya Çoban.
VİKTORİYA ÇOBAN Kongaz küüyü S.Demirel adına moldovan-türk liţeyin istoriya üüredicisi
“İstoriya derslerindä verilerlär ayırı temalar, angıları Moldovanın baamsızlıı olayları için annadȇrlar, ama uşaklar lääzım bilsinnär, ani baamsızlık o diil sade devletin sınırlarının belli edilmesi. Ona girerlär bizim adetlerimiz, dilimiz, bizim dedelerimiz, ana-bobalarımız. Onuştan da biz evlad boyları aralarında bu dialogu geçireriz. Bizä deyni önemni işitmää üürenicilerin bakışlarını hem annamaa, angı paalılıklar onnarda 35 yıldan sora olaceklar”.
Üüretim ortamına deyni bölä olaylar vererlär kolaylık marturların sözlerindän açıklamaa hem annamaa olayları, nışannadı Kongaz küüyü S.Demirel adına moldovan-türk liţeyin öndercisi Sofya Panaitova.
SOFYA PANAİTOVA Kongaz küüyü S.Demirel adına moldovan-türk liţeyin öndercisi
“Biz hazırlandık ölä, ani üürenicilär istoriyaya diisinnär yakışsın”.
Dialogun, interaktiv sınışların hem marturların annatmaklarınınnan uşaklar derindän baamsızlıın maanasını, istoriya olaylarını hem onnarın millet paalılıklarınnan baalantısını annayabildilär.