Коmradın regional resim galereyasında kendi özel sergisini resimci Natalya Vornikova açtı. Ȇkspoziţiyasına resimciyka kolekţiyasından 34 resim çıkardı. Yaratmalar-16 yaradıcılık çalışmasını açıklȇȇrlar.
Natalya Vornikovanın resimneri resimcinin stilini hem dünneyä bakışını açıklȇȇrlar. Sergidä eni işlär: batik hem grafika işleri temsil edilerlär.
«Var şıralı resimnär, var resimnär iilii gösterennär. Var öleleri dä, angıları düşünmeklerimi göstererlär»,- dedi resimci.
Natalya resimneri taa çok yaalı boyalarlan yazȇr. O açık, uygun birkaç renkli boyaları yaratmalarında kullanȇr, ne derin duyguları publikada uyandırȇr, söleer kultura bakannıın başı Marina Semönova.
«Avtonomiyanın kulturasına ödenmäz çalışmayı getirersiniz. Siz käämil üürediciysiniz. Uşaklarda sevgiyi halkına, küçük Vatanına terbiedersiniz»,- nışannadı kultura bakanı.
Çadır-Lunga dolayın üüretmäk, kultura, gençlik hem sport uzmanı Lüdmila Galaslı belli etti, ani sergidä millet koloriti duyulȇr.
«Natalyanın resimnerini seftä görmeerim. Burada eni resimnär dä var, gagauz halk çizgilerinnän. Sergi duygulandırdı»,- sayȇr Çadır-Lunga dolayın üüretmäk, kultura, gençlik hem sport uzmanı Lüdmila Galaslı.
Sergidä avtorun 30 resimindän zeedä var, onnarın arasında büük tä, küçeräk tä. Herbiri dä resimcinin iç dünnesini açıklȇȇr, onun düşünmeklerini. Serginin musaafirleri, Natalyanın kolegaları, dostları özel sergiylän kutladılar.
«Resimciykanın kendi stili. Yaratmaların temaları: adamnar hem karılar. Resimnerin taa çoyu bitki 5 yılın içindä yazılı»,- nışannadı Födor Duloglo.
«Bu insanda okadar çok ȇnergiya. O etiştirer resimneri yazmaa, kuklaları yapmaa, uşakları üüretmää, resim okulun direktoru çalışmaa. Onun yaradıcılıı açık hem derin»,- düşüner resimci Nina Peeva.
«Natalyanın işlerindä sevgi yaşamaya görüner, duyguları. Her zaman sevinmeliklän onun sergilerinä giderim yaradıcılıını da gözlederim»,- çizgiledi resimci Grigoriy Deçev.
Natalya Vornikova kendi yaratmalarını sergilerdän kaarä tipar koverimnerindä dä erlşeştirer. Resimci illüstraţiyaları gagauz kiyatlarına hazırlȇȇr.
Resimnerdän kaarä, sergidä Natalya 11 avtorluk kuklasını teklif etti.
«Biz alıştık görmää kuklaları gözäl üzlü hem giimni. Bän kuklalarımda istedim göstermää insannarın diri duygularını, gülüşlerini, ki ideal olmasınnar»,- ekledi resimci Vornikova.
Serginin herbir yaratması – avtorun çok yıllık yaradıcılık çalışması Natalyanın fantaziyalarınnan hem ustacılıınnan yapılı.
Avtor: S. Dimitroglo, operator: А. Glekov, montaj: А. Gerçu