Oktäbrinin 29, premyer-ministru görevinä teklif edilän Aleksandru Muntänu Moldova parlamenti frakţiyalarınnan konsultaţiyayı geçirdi. O eni programayı açıkladı hem onda olan prioritetleri belli etti. İlk erdä – herbir vatandaşı düşünmää onun iilii için işlemää. Hep ölä bu programada var punkt, neredä yazılı, ani insannarın ay paraları üüselecek. Ani yavaş-yavaş en küçük ay parası 10 000 bin ley olacȇk. Orta ay para sa 25 000 ley olacȇk. Sölenildi, ani ekonomika ilerlesin deyni türlü işlär yapılacȇklar. 100 000 kişiyä deyni iş erleri açılacȇklar. Küçük uşaklı aylelerä taa büük posobiyaları ödeyeceklär. Eni programada hep ölä yazılı, ani hükümet neetli uşak başçalarında en küçük uşaklar için 5 000 er açmaa. Hep ölä Aleksandru Muntänu söledi, ani pensiyalar üüseleceklär, yaşlı insannar için türlü soţial garantiyaları olacȇklar.
Yaşayannar bildirderlär umudu, ani devletin ȇkonomikası hem soţial sferası ilk erdä lääzım olsun Hükümetä deyni. İnsan sayȇr, ani kazanç parası hem pensiya parası lääzım büüsün.
«Belli ki en ii yaşamaya umutlanȇrız, ama pek inanılmaz».
«Yaşamayı ii hala getirsinnär, insan için düşünsünnär. Gaza, şafka paayı indirsinnär, bekleeriz».
«Bekleeriz, ani devletin ȇkonomikası kalkınacek. Şindi umutlanȇrız, ani taa ii yaşayacez».
«Yardımnasınnar yaşayannarı, çünkü zor vakıtları yaşȇȇrız. Gireriz suuk zamana, katölu korkasın koşmaa».
Seçili premyer-ministr Aleksandru Muntänu oktäbrinin 28-dä, Sali günü, kendi komandasını teklif etti hem «ЕB, usluluk, ilerlemäk», programasını açıkladı.
«Programaylan hükümetä gideriz, ki deputatların votumunu kazanmaa. Önemli davamız — ȇkonomikayı devlettä hem komandamlan MD yakınnarda Evropa Birliinä», —yazdı Aleksandru Muntänu Facebookta.
Aleksandru Muntänu kandidaturasını ministerlik kabinetlerini öndercilik etmää deyni PAS frakţiyası teklif etti. Prezident Maya Sandu oktäbrinin 24-dä imzaladı izini, onu premyer-ministru erinä, Hükümetin spikeri İgor Grosu bildirildi. Emini öndercilär oktäbrinin 31-dä vereceklär.
Moldovanın hem Gagauziyanın en mekalı haberleri GRTnın Telegram kanalında!