Paskellä – hristian yortuların birisi, angısı en gözäl hem açık bir yortu. Paskelleya karşı evlerdä özel bir durum- hatır ihtiarlara, can paklanması hem yortuya hazırlanmak. Nicä yaşayannar bu günä hazırlanȇrlar üürendi Natalya Andrieş.
Paskelleya hazırlanmaa çekederlär taa ileri yortulu geceyädan. İnancılar için bu büük orucun vakıdı- duva etmeklär, ii işlerin yapılması. İnsannar savaşȇrlar taa sık kliseyä gitmää, ayläylän vakıdı geçirmää hem yardım etmää onnara, kimä bu lääzımnı. İnancılar aklına getirerlär olayları, angıları olmuşlar da hazırlanȇrlar karşılamaa hristian dünnenin baş yortusuna.
«Paskellä o açan öldürdülär İisus Hristosu da o sora dirildi. O öldü bizim günahlarımız için.»
«Bizim analarımız- bobalarımız yortulardılar. Biz ta bunu yapȇrız. Uşakları, unukaları üürederiz. Bekleeriz musaafirleri. Düşünerim, ani herkezi bunu yapȇr.»
« İlkin lääzım üreklän hazırlanmaa, neçinki Hristos dirildi diil onun için, ani sade bir gün yortulamaa bu işi, ama her gün sevinmää, ani o dirildi.»
«Hepsi buna hazırlanȇr, hepsi pravoslav insannar bekleerlär- bu ilkyaz çeketmesi. Biz dä hazırlanȇrız.»
Ama hep bu vakıt evlerdä dä hazırlanmaklar olȇrlar. Çorbacıykalar tertipleerlär herersini, evlerini hem aullarını paklȇȇrlar. Adetä görä kozanakları pişirerlär hem yımırtaları boyȇrlar- eni yaşamanın hem enilenmesinin simvolunu. Tükennerdä hem panayırda belli insan gezintisi. Yaşayannar alȇrlar imelik mallarını yortulu masa için.
«Karım hepsini yapȇr. Elbetki isteeriz birbişey eni. Ama o yapȇr olivye hem paça. Yapȇrız gagauz imeklerini dä. Kozanak hem boyanmış yımırta sofrada olacȇk — bu maasuz olȇr. Bu adet da onu unutmȇȇrız».
«Elbetki masa hazırlayacȇz. Hısımnar geleceklär. Çok yapmȇȇrız, ama paça hem sarma olacek».
« Yavaş- yavaş hazırlanȇrız. Aldık tatlılık, balık, şindi kozanak alacȇz. Aylemizlän toplanacȇz. Hısımnarı aklımıza getirecez. Kefimiz islää, para aaz, ama diil bişey. Lääzım yaşamaa, sevinmää yaşamaya. Hepsi islää».
« Yanıylan naşeysä yapacȇz».
« Elbetki yapacez. Diil ölä çok nekadar taa ileri yapardık, ama hep okadar. Bän yalnız yaşȇrım, ama paça yapacam, bir parça yaanı alacam».
Yortunun ilerlemesindä gecä slujbası olacek. Cumertesi avşamnen inancılar toplanacȇklar kliselerdä karşılamaa paskellä yortusunu.
« Biz gidecez kozanakları mutlaka serpmää. Bunu bekleeriz hem umutlanȇrız, ani hepsi islää olacek. Uşaklar unukalar yakın insannar saalıklı olsunnar».
Slujbadan sora ötecek paskellä selemneşmesi- «Hristos dirildi!», angısına cuvap edeceklär «Akına dirildi!».Paskellä o diil sade yortululu masa, ama din maanası, angısı insanı birleştirer. Bu umut, inan hem ii buluşmakların vakıdı. Açık yortu aklımıza getirer, nekadar önemni olsun sevda, dayanmak hem biri-birini tutturmak. Paskellä birleştirer ayleleri hem evleri sıcaklan doldurȇr.
Moldovanın hem Gagauziyanın en mekalı haberleri GRTnın Telegram kanalında!