Komrattan Arnaut Mariyanın istoriyasını açıklayacez, karının, angısı koyun yapaayını haliz incäzanaat yaratmasına çevirer. O gösterecek yapaayın yolunu el yıkamasından fabrika işinädän. Nicä halk tradiţiyaları korudulȇrlar hem evcimannık malları yapılȇrlar Svetlana Dimitroglo gözletti.
Маriya Arnaut koyun yapaayını erindeki fermerlardan alȇr hem sade o yapaayı, angısının var nicä ellän işlemää. Evdä o malı yıkȇȇr, büümnerdän hem gübürdän paklȇȇr, sora da ellän kirdän hem yaadan yıkȇȇr.
«Hazır yapaayı haşlanılmış suda yımışadȇrım, giisi sabununnan yıkȇȇrım. Onnan yapaa islää paklanȇr hem kalitesi bozulmȇȇr. Durlȇȇrım da koyȇrım kurusun»,- nışannȇȇr Mariya.
Yıkanmış yapaayı Mariya dışarda, güneştä kurudȇr. Sora ellän düüyer onu – bu iş çok zaman alȇr. Çorbacıyka el işindän sora, yapaayı fabrikaya götürer, neredä malı taraktan geçirerlär, yorganın çarşafını dikerlär, yorgan hazırlanȇr.
«Bän sizä geldim bir büük, bir dä küçük yorgan diktirmää»,- söleer Mariya Arnaut.
Fabrikada bir sıra iş yaptıktan sora, yapaadan yorgan Mariyaya geler.
«Pek beendim, nicä yorganı diktiniz. Kırnak hem islää oldu»,- sayȇr Mariya.
Yapaadan yorgan – unukal mal, angısı evdeki işleri hem fabrika kalitesini birleştirer, gösterip koyun yapaayın evcimannıkta kullanmasını.
Moldovanın hem Gagauziyanın en mekalı haberleri GRTnın Telegram kanalında!