Enseyişin 80-ci yıldönümünä baalı Komrat N.Tretyäkov adına liţeyindä bir sıra olay geçti. Uşaklar, üüredicilär hem musaafirlär katıldılar gül alleyasının açılmasına, bundan kaarä geçirildi futbol turniri dä.
Tekliflän kurmaa N.Tretyäkov adına gül alleyasını çıktılar üürenmäk kurumun üürenicileri, nışannadı liţey başı Polina Pıntä: «Alarak esaba, ani bu yıl biz nışannȇȇrız Enseyişin 80-ci yıldönümünü, biz kararladık ekologiya akţiyasını geçirmää».
Gagauziya Bakannık komiteti başı ilk yardımcısı İlyä Uzun çizgiledi, ani evladlar lääzım korusunnar raatlıımız hem usluluumuz için yaşamaklarını verän kahramannarın adlarını.
Arhiv haberlerinä görä, N.Tretyäkov 1944-cü yılda Yässı-Kişinöv operaţiyasında pay aldı, angısının süresindä Komradı askerlär kurtardılar. Bu istoriya sayfalarını herkezi lääzım bilsin, açıkladı Komrat kasabası primar yardımcısı Stepan Kara: «Biz herzaman lääzım şükür edelim o insanarı, angıları bizä raatlıı hem serbestlii baaşladılar».
N.Tretyäkov adına liţey büün bulunȇr Gagauziya en büük liţeylerin sırasında. Burada 900 üüreniciyä yakın üürener. Herbiri onnardan olayın geçirmesinä büük cuvapçılıklan yaklaştı, nışannadı büük klaslar nasaatı başı Sergey Mavrodi: «Bän bu yıl şkolayı başarȇrım, ama umutlanȇrım, ani ardımızdan gelän üürenicilär bakaceklär, tertipleyeceklär hem koruyaceklar bu başçayı, bu alleyayı».
Olayın ofiţial payından sora üürenmäk kurumun spotr meydanında futbol turniri geçti, onda pay aldılar Komrat kasabası üürenmäk kuruluşların takımnarı.
«Turnirin kurucularını şükür ederim, Bakannık Komitetin adından baaşlȇȇrız sizä futbol toplarını»,- dedi gençlik hem sport bakanı Vaçeslav Dragoy.
Nikolay Tretyäkovun adı üürenmäk kuruluşuna verildi 50 yıl geeri.
Avtor: A. Terzi, operator: G. Stavilov, montaj: A.Gerçu
Moldovanın hem Gagauziyanın en mekalı haberleri GRTnın Telegram kanalında!