Kazayak küyüün yaşayanı Afanasiy Beliogluyu biler bütün küü. O 80 yaşını tamannadı.Avaları halk türkülerinä yazȇr,gençlerä ihlam verer, ana erin kulturasına izmet eder.
Herbir küüdä var insannar,angıları kendi yaradıcılıınnan küüyün can erini kaplȇȇrlar.Onnar halkın kulturasını,istoriyasını,adetlerini yaşadȇrlar.Kazayak küyüünä deyni bu insan -Afanasiy Belioglu.«Sevda» folklor kolektivin hem halk orkestusunun pay alanı, uşak başçasının uzmanı. Kazayak muzey uzmanı Elena Terzi getirder aklısına muzikacının çalışmalarını.
«Afanasiy Födoroviç uşak başçasında 1978 –ci yıldan çalışardı. Biz onu bilärdik,çunkü herbir yortuda,topluşta o ordaydı. O duhovoy orkestruyu da, horuyu da götürärdı, şkolada da çalışardı, sora uşak başçasına geçti. Biz öktur gördüydük o üfkelensin uşaklara. Diil sade uşaklarlan,büüklärlän dü ölä çalışardı»,- Elena Terzi getirder aklısına.
Yıllar boyunca Afanasiy Födoroviç küü uşaklarını muzika uurunda terbietti. Onun hatırınnan çoyu muzikaylan seftä tanıştı.
«Uşak başçasının zanaatçıları ülendä, uşaklar uyarkana, toplanardılar Kultura evinä.Yaptık ansambliyi, horu yaptık. Zahar Nikolayeviç dedi, alarsanız ilk eri yarışmada,dinnenmää Krıma yollandırıcam sizi. İlk eri kazandık, gittik»,- Afanasiy Födoroviç söledi.
Afanasiy Födoroviçin avalarına görä, çoyu gagauzların şairlarına halk türküleri yazıldılar. Onnarı büünnän büün «Sevda» folklor kolektivi çalȇr,söleer «Sevda» folklor kolektivi başı Pelageya Çoban: «Sevda» ansamblisinin repertuarında var 7 türkü onun avalarına görä. Biz pek severiz onnarı, onnar bu adam candan, bütün ürektän yazdı».
Kultura evi başı Mariya Taka nışannȇȇr, ki Kazayak küüyün kultura evindä yıllarca Maestrunun türküleri öttü.
«O talantlı bir adam .O diil sade ava kursu, o biler evelki oyunnarı da, angılarını Kazayak küüyündä oynaardılar.Biz neetleneriz koymaa o oyunnarı da»,- Mariya Taka nışannȇȇr.
Bu zamannarda Afanasiy Födoroviç deer. ki önemli bütün kuvetleri koymaa, deyni gençleri tutturmaa ,iş erlerinä onnarı teklif etmää, deyni onnar ana küüyündä kalsınnar.
«Yardım et te bu insanın talantlıı uşaana, üüret onu, yap ölä, ani o işlesin burada. O evlenecek, burada kalacek. Gitmeyceklär»,- Afanasiy Födoroviç deer.
«Sevda» folklor kolektivi büük dostunu Afanasiy Födoroviçi kutlamaa geldi. Belioglo aylesindä muzika hem şükür etmeklär adetçä öttülär.
«Te nekadar da aulda işlerim, yorulȇrım. Akardionu alȇrım – dinnenerim. O olmasın –bän yaşayamayaceydım 80 yaşınadan».
Ama nicä biliner,herbir kuvetli insanı –aylä tutturȇr.Sevgili eşinnän Nina Nikolaevnaylan 55 yıl barabar yaşȇȇrlar.Uşaklarını,unukalarını büüttülar ,ev sıcaklıı,raatlıı, aylä paalılıklarını terbiederäk. Bu da onun muzikasının bir büük payı.
«Biz herzaman birtürlü düşüneriz.Birerdä da annaşa –annaşa iş yapȇrız ikimiz. Nicä decän-bizim lafımız. 3 uşak yarattık. Unukalarımız var .Onnar bizä deerlär,ani biz en ii ana- boba onnara. Biz sizdän her zaman örnek aldık.Siz bizi ii terbiettiniz»,- söledi Nina.
Afanasiy Belioglunun muzikası çoktan Kazayak küüyün istoriyasının payı oldu. Nekadaradan onun avaları öteceklär, okadar da onun can sıcaklıı insana hem sevgi ana topraana yaşayacek.
Moldovanın hem Gagauziyanın en mekalı haberleri GRTnın Telegram kanalında!