Kıpçak küüyündän duuma Aleksandr Gaydarlı, Evropa çempionadın serbest güreşmesindä 21-yaşınadan sportçulara deyni viţe-çempionu oldu. Kutlamaklarnan sportçuyu karşladılar onun duuma küüyündä.
Evropa çempionadı serbest güreşmesindä genç güreşçilerä deyni, geçti Serbiya devletindä Novi-Sade kasabasında, Aleksandr Gaydarlı beş keret güreşti 70-ci aarlık kategoriyasında. Finaladan, Aleksandr dört güreş geçirdi, angılarında, üsteledi sportçuları İtaliya, Bulgariya, Ukraina hem Germaniya devletlerindän. Finalda, zoor güreştä, tarattı Russiya devletindän sportçuya. Aleksandr Gaydarlı nışannadı, üüsek uurlara etişmää deyni, zoor hazırlanmaklar geçirildi.
Büük ambiţiyalar hem istemäk kendi bilgilerini taa üüsek uura kaldırmaa, bu kaliterlär var büük sportçularda. Aleksandr Gaydarlı çizgiledi, ani yannşlıklar doorudulacek, ki öbür kerä, en üüsek eri almaa.
Aleksandr Gaydarlının duuma eri Kıpçak küüyü, on iki yaşından beeri, güreşlän zanaatlanȇr Russiya devletindä. Ama birda zaman unutmȇr kendi Kıpçak küüyünü, sportzalı, nereda o başladı yapmaa ilk adımnarı güreşmedä. Aleksandr Gaydarlı Moldova Respubklikasının serbest güreşmesi şannı trenerın Födor Franjevın üürenicisi.
Kutladılar Aleksandr Gaydarlıyı güreşçilär, dostlar hem o Kıpçak küüyün yaşayannarı, angıları herzaman sportçunun başarlarına sevinerlär. Genç güreşçilär, angıların trenirovkasına geldi Aleksandr, annadȇrlar, ani hepsini yapaceklar ki etişmä o uurlara nica Aleksandr Gaydarlı, var ölä da, kim taa üüsek uura etişmä isteer.
«Bän hepsini yapacam, ki ilk yada ikinci eri alma türlü yarışmaklarda. Lääzım istemä etişmä üüsek uurlara».
«Sevinerim, ani Saşa ikinci eri kazandı Evropa çempionadında. Bän isteerim ilk eri kazanmaa. En büük benim istemäm, Olimpiada oynunnarında çempion olma».
Aleksandr Gaydarlının başarıları, gözäl bir örnek genç güreşçilerä, örnek, ani bütün kuvetlän sportlan zanaatlanarkan üüsek uurlara var nicä gelmää .
Kısa zamanda, Aleksandr Gaydarlı başlayacek hazırlanmaa dünnä serbest güreşmesi çempionadına , angısı İspaniya devletindä sentäbri ayında geçecek.