Svetlıy agrar-tehnikumunda agrariylar toplandılar da konuştular, nasıl dooru kullanmaa otluk erlerini Gagauziyada hem da kuancılık uurunda kanonnar nasıl uygulanêr.
Agrar bakannıın er ilişkileri hem kadastr bölümü başı Valentina Şikil açıkladı, nasıl primariyalar hem fermerlar dooru hazırlasınnar dokumentleri, ki fermerlar raat çalışsınnar, hem erli kuvetlär da büdjeta gelir alsınnar.
«Bügün primariyalar lääzım yapsınnar analiz – kaç hayvan var küüdä. Var küülär, angılarında az otluk erleri var, var da öleleri, angılarında bin ektardan zeedä. Lääzım ki erlär boş kalmasın, gelir getirsin»,- Valentina Şikil açıkladı.
ANSA Valkaneş ofisi veterinariya bölümü başı Valeriy İvasenko dedi, ani en önemli– primariya hem fermer arasında annaşmak olsun hayvan otlatmak için.
«Otluk erleri az, çünkü primariyalarda pek yok er bu iş için. Kanon diişmedi, o sade düzelder ilişkileri kuvetlerin hem hayvancılar arasında. Orada yazılı, kaç ektar lääzım bir hayvana. Laf gider otlatmak erleri için»,- Valeriy İvasenko dedi.
Agrar bakannıı ekologiya hem su resursları izmeti başı İvan Draganov bildirdi, ani yapılacek diişikliklär otlatmak hem ot biçmäk hakkında.
«Her yıl bölä soruşlar çıkêr: ne zaman otlatmak, nasıl kontrakt yapmak primariyaylan, patent almak hem kanonnara uydurmak. Kuancılar için önemni – sayıya koyulmaa BeeProtect programasında, ki problem olmasın da kuannar kalsın diri»,- İvan Draganov bildirdi.
ANSA büümneri korumak bölümü başı Olga Moş dedi, ani BeeProtect programası yapıldı, ki kuannarın sayısı azalmasın.
«Şimdi pek az kuancı hem agrariy koyuldu bu programada. Problem var – sayıya koyulmaa deyni lääzım elektron imzası, ama o da yok herkezdä»,- Olga Moş dedi.
Seminara katılanlar dedilär, ani bölä toplantılar faydalı – yardım eder üürenmää enilikleri hem koymaa soruşları.
«Otluk erleri için lafedersek, bu bugünkü günün probleması diil , o çoktan lääzımdı kalksın. Bakın ne olêr otluk erlerinnän – yok neredäyse, ama kanon var. Onnarı bütün yıl kullanêrlar, çünkü çok insan deer, ki hayvanı beslemää yok neylän».
«Kendisi bu bölüm taa ii olabilir. İstärdik ki devlet ta dikkatlı baksın buna. Çünkü arının faydası çok büyük, bizim düşündüümüzdän da çok. Umutlanȇrız, ki sezon iyi olacek».
«Bän BeeProtecte artık 4 yıl varım, program pek ii, ama lääzım onu taa geliştirmää. Var ölä momentlar, ani biz orada varız da girämeriz programa. Çok doner, yada kimi erlerdä hiç çalışmêȇr».
«Büük problem olêr, nezaman biz hotuları çıkarêrız orman erlerinä bal almak için. Onun için bu diişikliklär çok önemli. Kanon da kabul edildi – her kim kiralêr eri, yada kim kullanêr gerbiţitları, öncä haber vermeli kuancıya».
Seminar geçti Agrar Bakanıın uzmannarınnan hem ANSA temsilcilerinnän. Neetliydi açıklamaa fermerlara hem kuancılara bütün diişiklikleri, ani onnar çalışsınnar kanon içindä.
Moldovanın hem Gagauziyanın en mekalı haberleri GRTnın Telegram kanalında!