Moldovada enidän pasajir götürmeklerin paası büüyer.
Çiçek ayın 10-dan ANTA kararladı eni pasajir götürmeklerin paasını. Rayonlararası marşrutlar için – 0,97 ley kilometr için (eskiycä 0,90) ikinci komfort kategoriyası için 1,09 (eskiycä 1,03) birinci kategoriya için. Rayon içindä marşrutlarda paalar kalktı: 1,02 dän 1,11 leyä, hem 1,15dän 1,24 leyä kilometr için. İlkyazın çeketmesindän bitki diişiklerä kadar rayon arası tariflär kurardılar 0,75-0,86 ley kilometraya, rayonda da — 0,85-0,96. Gagauziyanın yaşayannarı nışannȇȇrlar, ki duydular pasajir götürmeklerin paalılanmasını.
« Bän işiderim hem görerim, nicä pasajir götürmeklerin paası büyer. Nicä şoferlar bölä paalara var nasıl satın alsınnar petrol mallarını, açan biletlär eskiycä tutȇrlar? Bölä olmaz».
«Elbetki, paalar hepsinä kalkȇrlar . Bän geldim kendi pensiyamnan 2000 ley , da ne bän var nasıl satın alım? Bän çoktan gezmeerim transportta, ama büün gelip, esap aldım, ki geçti aftadan paası kalktı 1 leyä , da bölä her gün onnar büüyer. Nicä bu olaylar var nasıl düümesinnär cöbümüzä? Koşulları ödeyip, ne kalȇr bizä?»
«Bän çok gezmeerim avtobusta, ama büün lääzım oldu gideyim uşaklarıma Tiraspolä, da duydum ki paalar pek kalktılar, 10-20 leyä kadar. Hererdä diil birtürülü, ama kalktı. Çıkış: ki taa çok dikkatlık verilsin pensionerlerä, neçinki bizä pensiyaları kaldırdılar sade 6 proţendä».
«Bütündän aldıynan, paalar kalktı 20 proţendä. İnsana, angısı bizneslän kazanȇr, sanȇrım, ki bu taa dayanan, ama bizä deyni pek bet. Sanȇrım, ki ötää dooru başka mallara da paalar kalkacek. Söleyim halizdän , sanmȇȇrım , ki nesoysa çıkış bu durumdan olacek».
«Elbetki, paalar pek kalktılar hem hepsi mallara. Dezginjayadan 4 leyä pasajir götürmeklerin paası kalktı».
«4 leyä kalktı yol Dezginjaya gitmää deyni. Bän pek duymȇȇrım bunu , neçinki gezerim bu yoldan 1-2 sıra ayda. Ama insan, angısı işleer da hergün gezer yollarda , ama sanȇrım pek belli ediler. Hep okadar savaşȇrız ötää dooru yaşamaa bu zorluklarda».
Komrat Avtonstanţiya temsilcilerin laflarına görä, büünkü gündä en lääzımnı reyslara Kagul – Komrat yolun paası kurȇr 88 leydän 27 bandän — 113 ley 49 banä kadar , bakarak marşruda. Komrat – Kişinöv çekeder 90 leydän 21 bandän taa 92 ley 15 banä kadar. Kişinöv- Kagul 96 ley yol kurȇr. İstedik kommentariy kabletmää şoferlardan da , ki onnarın bakışını buna üürenmää, ama onnar kayıl olmadılar. Hükümet nışannȇȇr, ki bölä durum kuruldu ondan sora nicä Günduusu tarafında konflikt çeketti hem Ormuzskiy prolivı kapandı, angısı pek önemni neft malları için. Devlet transport agenstvosunda nışannȇȇrlar, ki diişmeklär bakılȇrlar karara görä mardın 26 dan. Bu kararın bölümünä görä tariflar var nasıl diişilsinnär 7 gündä bir sıra, bakarak petrol malların kalkmasına.
Moldovanın hem Gagauziyanın en mekalı haberleri GRTnın Telegram kanalında!