Paskellä — o bir büük maanalı yortu, açan dirilerlär adetlär, doldurup evleri sıcaklıklan hem şenniklän. Komrattakı Tretyakov adına liţeyindä bu büük yortuyu özel uurda kaarşıladılar — boyalı yımırtalarlan, Paskellä tavşamnarınnan hem Lazari oyunnarınnan.
İlkyaz — o yortulu enilenmäk vakıdı. Sayılêr, ani tavşamnar getirerlär şennik, vaarlık, türlü renklerdà boyalı yımırtalar sa göstererlär eni yaşamayı. Ama neçin maasuz tavşamnar Paskellä simvolları? Bu soruşa üürenicilerdä var kendi cuvabı.
«Neçin deyni tavşamnar söleerlär, ani ilkyaz geler».
Büük Paskellä yortusuna kaarşı Komratta Tretyakov adına liţeyindä halk adetlerinä adalı gün geçti. Uşaklar yımırtaları boyadılar, tavşamcıkları yaptılar hem bolgar halkın adetlerinnän tanıştılar. Herbir üürenici Kendi işinä kendi fantaziyasını koydu.
«Bän beenerim benim tavşamcıımı- kırmızı yanacıkları — kendisi biyaz, hem da yımırtacık maavi».
«Bän beendim bos tavşamı. Hep ölä onu beendilär Nikita hem Arseniy».
«Neçin deyni ilkyazın tavşamnar diiştirerlär renkini, olêrlar bos».
«Boyadım yımırtayı, ama biraz olamadı».
«Bendä hepsi oldu — benim tavşamcıımda var bıyıcak hem onun yanacıkları kırmızı».
Liţeyin başı Polina Pıntä söledi, ani liţeydä koruyêrlar hem ilerlederlär Paskellä adetlerini.
«Hepsimiz biz bileriz, ani hem gagauzlarda, hem bolgar halkında bölä büük yortuya kaarşı var adet — yımırta boyamaa. Büün biz kararladık bunu üürenicilärlän barabar yapmaa. Bolgar grupasından uşaklar üüsek uurda pay alêrlar. Bundan kaarä bizim liţey festivallerdä pay alêr, angıları her yıl Serbiyada geçer, bizim uşaklar orada pay alêrlar»,- Polina Pıntä söledi.
Meraklandırdı uşakları parafinnän boyamak- onnar ilk keret bunu denedilär.
«Açan yazın biz bulgar grupaylan lagerä gittik orada master klas yapıldı, gösterdilär nesoy bu yımırtaları yapmaa».
«Büün boyêrız yımırtaları parafinnän, o pek meraklı bir iş. Alêrız bir küçük parçacık, te bölä yazalcaa koyêrız, yısıdêrız onu da resimneriz».
«Ilk keret Paskellä için yımırta boyêrı. Pek beendim».
Taa pek Yortulu atmosferayı kurdular bolgar halk oyunnarı. Kızlar Lazari oyununu gösterdilär hem onun maanası için söledilär.
«Bu gündä kızlar gezerlär, türküleri çalêrlar, halk giimnerini giyerlär. Ev saabileri vererlär onnara yımırta hem tatlılık».
«Lazarki yortusu deniler. Kızlar gözäl renkli fistannarı gierlär».
«Bän bitki lafları en çok severim — оставьте на болг. «Стани, стани, детенце» ».
Bu liţeydä çalışêr uşak oyun grupası, neredä barabar gagauz hem bolgar okulcuları zanaatlanêrlar. Dersleri geçirer Bulgariyadan horeograf Marina Bankova-Raşkova. O üüreder diol sade oyunnara, ama tanıştırêr uşakları bulgar halkın istoriyasınnan hem kulturasınnan.
«Te bereket simvolu. Herbirinizä verildi çii yımırta. Taa ilerdän babular şeker un verärdilär. Bilersiniz mi onnardan ne yapardılar. Ertesi günü mamular pişirärdilär ne sa, da onnar iyärdilär»,- Marina Bankova-Raşkova söledi.
Uşaklar sayȇrlar, ani bölä olaylar vererlär kolaylık korumaa baalantıyı evlad boyların aralarında.
«Ki aklımızda tutmaa dedelerimizi, adetleri, vatanı».
Liţey direktoru Polina Pıntä söledi neçin önemni göstermää uşaklara adetleri.
«Biz yapêrız bunu ki adetleri korumaa, geçirmää onnarı evlad boylarına hem terbi etmää uşaklarda sevgiyi ana kulturaya»,- ekledi direktor.
Yortunun sonunda hepsini kutladılar bolgar dilindä.
Moldovanın hem Gagauziyanın en mekalı haberleri GRTnın Telegram kanalında!