Çok-Maydan küüyü uşak başçasında “Paskellä türküsü festivali” geçirildi. O Ana-bobaları, uşakları, terbiedicileri hem musaafirleri bir araya topladı. Uşaklar çaldılar türküleri hem annattılar şiirleri, angıları Paskellä adetlerininnän baalı.
Çok-Maydan küüyü «Yıldızçık» uşak başçasında üürenän uşaklar yortulu programaylan musaafirlerin karşısına çıktılar: paskellä türküleri, şiirlär, oyunnar hem insţenirovkalar. Ayırı er halk adetlerinä verildi- uşaklar meraklan paskellä adetlerini annattılar, onun simvollarını gösterdilär.
Kutlamak sözlerininnän festivalin payalannarına musaafirlär danıştılar. Protoierey, Hristosun göklerä Kalkınması adına klisä izmetçisi Grigoriy Kiţanu yortunun ruh tarafından maanasını açıkladı, nışannayıp, uşakların terbietmesi önemini sevgiylän hem saygıylan adetlerä.
«Yortuylan hepsi̇ni̇zi̇ kutlȇȇrim! Bu en büük hem gözäl bir yortu hem biz onu kutlȇȇrız, çünkü Hristos dirildi. Bizim kurtarılmamız için ölümü kabletti hem 3-cü gün dirildi»,- klisä izmetçisi Grigoriy Kiţanu açıkladı.
Çok-Maydan küüyün primarı Oleg Konstandoglo kutladı hepsini paskellä yortularınınnan , şükür edip uşak başçasının terbiedicilerini uşakları adetlerimizä sevgidä terbietmeleri için.
«Pek islää, ani bölä yortuları geçirerlär hem bizim uşakları terbiederlär»,- Oleg Konstandoglo kutladı.
«Yıldızçık» uşak başçasının öndercisi Elena Kambur nışannadı, ani bölä yortular yardım ederlär uşaklara yortunun ruh varlıını duymaa hem annamaa. Bundan kaarä incäzanaat becermeklerini dä ilelederlär.
«Saygılı masaafirlär, ana-bobalar, uşaklar hem festivalin pay alannarı. Bizim festivalimiz yaklaştı sonuna. Büün, sizin sesleriniz doldurdular bu salonu gözäl türkü avalarınınnan, sıcaklıklan hem açık, ürektän gelän duygularlan. Herbir şiir hem türkü yortumuzu gözelletti hem taa meraklı yaptı. Biz şükür ederiz herbirinizi sizin talantınız, sizin becermekleriniz hem muzikaya sevginiz için»,- Elena Kambur nışannadı.
Paskellä festivalindä terbiedicilär aktiv pay aldılar. Onnar hergünkü işindä kendi örneklerinnän uşaklarda atetlerä sevgiyi hem saygıyı terbiederlär. Uşaklar -bizim geleceemiz, onnarı terbietmektän çekiler regionun adetlerinä saygı gelecektä, nışannadı Elena Kambur: «İsteerim şükür etmää bizim ana-bobalarımızı da , uzmannarımızı da, angıları herzaman destek vererlär uşaklarımıza. Paskellä aklımıza getirer bizim adetlerimizi, ruh varlıımızı, sevdayı hem umudu. Büün isteerim bibliya sözlerini dä annatmaa: Allaa söler, olun uşak gibi. Bu söler onun için, ani büüklär dä uşaklar gibi açık ürekli olsunnar lääzım. Bu duygular bizä iilik yapmaa ihlam vereceklär».
Yortunun sonunda paskellä el yaratmalarını yapannarına şannı diplomnar verildilär, herbir musaafir dä baaşışlan salondan çıktı.
Moldovanın hem Gagauziyanın en mekalı haberleri GRTnın Telegram kanalında!