GHT «Tek ödemeklär için» hem «İndividual ekonomika patenti için» kanonnarını baktı. Deputatlar bu dokumentlerä diişmekleri giriştirdilär. Butakım bu kanonnar 2027-ci yılın yanvarin birinädän kuvettä olacȇklar. Ama var türlü engellär.
«Tek ödemeklär için» hem «İndividual ekonomika patenti için» kanonnar 2026-cı yılın yanvarin birinädän kuvettä bulunacȇydılar. Ama deputatlar ȇkonomika agentlerini düşüneräk ilersini aldılar da bu dokumentlerin zamanını zeedelettilär. Butakım onnar 2027 yılın yanvarin birinädän kuvettä olacȇklar.
Nikolay İvançuk, GHT bücet komisiyası başı, nışannadı: «Komisiyanın oturuşu oktäbrinin 28-dä geçti. Nasaat ederiz bu kanonu tek okumakta kabletmää. Lääzım almaa esaba, ani zamanımız aazalaȇr».
Deputat G.Dülger açıkladı, ani eni dokument kurulsun lääzım, çünkü ȇkonomika agentlerin kazançaları ayırılȇr biri-birindän.
Grigoriy Dülger, GHT deputatı, kendi bakışını açıkladı: «Kimsä kopar satȇr da ayda 50 ley ödeer, başkları sa gündä yarım ton kartofi var nicä satsınnar ya da başka türlü zarzavat — onnar da ayda 70 ley mdeerlär».
Deputatlar çizgiledilär, ani bu durumdan çıkmaa deyni eni kanon kabledilsin lääzım. Kanon proektini kurmaa Bakannık komitetinä izin verildi, söledi deputat İ.Dimitroglo.
İvan Dimitroglo, GHT deputatı, dedi:«Bu yılın bitkisinädän Bakannık komiteti eni kanon proektini hazırlasın lääzım».
Risklär için söledi GHT viţe-spikeri N.Ormanji dä .
Nikolay Ormanji, GHT viţe-spikeri, sayȇr: «Biz annȇȇrız ani Üüsek davaa palatası bu kanonu kuvettän çıkaracȇk. bu olduynan ekonomika agentleri kısa zamanın içindä kendi işlerini kanona görä sayıya koysunnar lääzım. Er onnar ceza kabledärsälär biz kabaatlı kalacȇz».
Ekonomik agentlerinin adından Raisa Savina lafetti.
Raisa Savina, ȇkonomika agenti, nışannadı: «Saa olsunnar deputatalar, ani bizi tutturdular. Biz ötää dooru işlemää isteeriz».
R.Savina söledi, ani o hem onun kolegaları patent için ayda 200 ley öderlär. Devlet kanonuna görä sä yılda 20 000 leydän zeedä olacȇydı, acıkladı ȇkonomika agenti. Bu para pek büük — açıkladı R.Savina. GHT sölenildi, ani avtonomiyada yakın 2 000 ekonomika agenti patent kullanȇrlar.
Moldovanın hem Gagauziyanın en mekalı haberleri GRTnın Telegram kanalında!