İyül ayın 1-ndä pravoslav hristiannarı Petrov orucu tutulȇr. Ayozlu Pötr Apostoluna adalı oruç başlȇȇr. Adetä görä , oruç Ayozlu Troiţadan sora çekeder.Biter o Pötr hem Pavel yortusunda, iyülün 11-dä.
Petrov orucu vakıdında, nicä da başka oruçlarda insannar ruh tarafında çalışȇrlar taa kaavi olmaa, nışannȇȇr Ayozlu İlya klisenin din izmetçisi boba Födor. O danıştı pravoslav hristiannara olsunnar taa saburlu.
«Büün Pötr hem Pavel orucun ilk günü. Oruç — ii bir vakıt, angısını Alla verer, ki insan kendi yaptıkları için düşünsün. Herbir insan lääzım çok kuvet koysun, ki onun canında sade ii duygular olsunnar. Bän hepsi insannara orucun süresindä dilerim olsunnar taa dayanıklı hem hatır gütsünnär yakın insannarına. Hepsi fikirlerimizlän Allaha lääzım danışalım, ki o bizi prost etsin» -, Ayozlu İlya klisesinin din izmetçisi Boba Födor annadȇr.
Gagauziyanın yaşayannarı paylaştılar, ani çalışȇrlar tutmaa orucu, çünkü bu önemli bir vakıt.
«Oruç tutȇrız, lääzım tutmaa, yaanı imemää, bişey yaalı».
«Önemli oruç tutmaa, bän ölä sayȇrım. Ruh tarafından taa ii olalım. Ama bän oruç tutmȇȇrım.”
«Bu dünnedä var nesoy sa kuvet, biz Allahın önündä lääzım taa ii olalım, kendimizi ruh tarafından lääzım taa ii yapalım. Bu vakıt buna deyni pek önemli»
«En önemli saalık için. Diil popaz için, diil kimsey için, ama sade kendimiz için bunu lääzım yapalım. Ayozlar Pötr hem Pavel sevineceklär buna. Bän 70 yaşındayım hem bilerim hepsi oruç kurallarını».
«Bu saalık için önemli. Açıktan söleyeräk, pek isteerim oruç tutmaa, ama ilaç içerim, yok kolaylıım oruç tutmaa»
«Bän herzaman oruç tutȇrım. Saalııma görä bunu yapȇrım».
Petrov orucu başladı iyül ayın 1-ndän hem sürtecek iyül ayın 11 — nädän. Bu vakıt pravoslav hristiannarı dua ederlär, oruç tutȇrlar hem bölä kendi dinini kaavilederlär.