Gagauziyanın hem Moldovanın şannı artisti Pötr Petkoviç duuma günü için Komratta konţert verdi.
Maȇstro Pötr Petkoviç, Gagauziyanın hem Moldova devletin şannı artisti Pötr Petkoviç, yaradıcılık konţertini «Arzu» grupasınnan hem Gagauziyanın Moldovanın artistlerinnän büük bir konţert verdi. Onu kendi Duuma gününä adadı.
Yaradıcılık avşamında salon artistin türkücülüünü sevennerinnän doldu. Çalgıcı, türkücü insannan sevdii türküleri hem eni yaratmalarını çaldı. Siiredicilär – yaşayannar, musaafirlär artistlän birerdä onun türkülerini çalardılar.
«Pötr İvaniviç gagauz halkını enidän şaştırdı. Bän sesledim onun iki eni türküsünü».
«Geniş cannı bir adam Petkoviç. Saalıklı hem başarlı olsun».
Gagauziyanın şannı artisti Lüdmila Tukan büük sevinmeliklän maȇstronun yaradıcılık avşamına katıldı. Gagauzyanın publikasınnan buluşmak, artistä deyni, nicä bir taazä soluk.
«Duuma erimin yortularına geldim, Pötr İvanoviçin Duuma gününä düştüm».
Artisti Duuma gününnän Gagauziya kultura bakanı Marina Semönova kutladı.
Marina Semönova Gagauziya Kultura bakanı: «Ко Allaa korusun sizi bizä, gagauzlara, deyni. Olsun saalıınız, ilerledäsiniz bizim kulturamızı».
Pötr Petkoviç şükür etti hepsini, kim onun yortulu avşamına katıldı, kim tutturdu hem sever artistin türkücülüünü.
Pötr Petkoviç, Gagauziyanın Şannı kultura çalışanı, MD Şannı artisti: «Pek beendim konţerdi, publikayı duydum. Benimnän birliktä türkülerimi çaldılar».
Sţenadan duȇt türküleri, muzıka yaratmaları hem cannı türkü çalması işidildi. Yortulu avşam gagauzların gimnınnan başarıldı, angısını bütün salon ayakça artistlärlän çaldı.
Moldovanın hem Gagauziyanın en mekalı haberleri GRTnın Telegram kanalında!