Tezlä vakıtlarda Baurçu küüyün primariyanın dolayında çekedeceklär işlär tertiplemäk uurunda. Giriştiriler proekt erli iniţiativa «Gagauz korafları» gruppanın danışmasına görä. Bizim televizion gruppamız bulundu bu yaşamak erindä.
Baurçu küüyün erli kuvetleri yazdılar proekti «Gagauz korafları» iniţiativ grupanın danışmasına görä. Küüdä yapılaceklar teriplemäk işleri primariya yapının dolayında. Nesoy işleri neetlenerlär erli kuvetlär yapmaa, haberledi Baurçu küüyün primarı Sergey Tukan: «Bütündän diişecek basamaklar, plitkalar diişeceklär, pandus, brusçatka koyulacek, otmostkalar kaaviliştirileceklär. Bütündän diişecek yolcaaz bardürun ardında, angısı olacek bir uurda panduslan. Kolay gireceklär burayı bizim kolaylıksız insannar».
Teriplemäk işleri primariya yapının dolayında Baurçu küüyündä yapılmadılar şindän sora 10 yıldan zeedä, çizgiledi primar Sergey Tukan. Pandus, angısı taa ileri erleştirildi primariya yapının girmesinä, uymȇȇr stadartlara görä, ne zorladȇr kolaylıksız insannarı, girmää deyni primariyaya.
«Te biz göreriz bu pandusu, göreriz ileri dooru bardüru, angısına görä bizim insannarımızın yok kolaylıkları gelsinnär primariyaya. Bu pandus, kendiniz görersiniz, ani o işlämeer»,- Sergey Tukan haberledi.
Baurçu küüyün primarı Sergey Tukan haberledi, ani proekt, primariyanın dolayını tertiplemesi için islä giriştiriler. Zamandaşta hazırlanȇrlar dokumentlär hem annaşmaklar.
«Bän sayȇrım, ani iki aftadan sora biz çekedecez işlemää. İşlär sürteceklär üç ay o üzerä, ani büük iş olacek»,- Baurçu küüyün primarı Sergey Tukan haberledi.
Baurçu küüyün primariyanın dolayında tertiplemäk işlerinä harcanacek 217 bin ley, paranın taa çoyunu geçirecek Agrar sektorunda intervenţiya hem ödemäk agentstvosu, 67 bin ley sä regionun bücetindän kontribuţiya .
Avtor: P. Barbova, operator: V. Kıssa, montaj: M. Kazaku
Moldovanın hem Gagauziyanın en mekalı haberleri GRTnın Telegram kanalında!