Aprelin 16 — da Komrat Devlet Universitetin konferenţ — zalasında Gagauziyanın hepsi yaşamak erlerin primarları buluştular Moldova devletin merkezin kuvetlerinnän. Buluşmak geçti avtonomiyanın primarların iniţiativasına görä. Onda pay aldılar türlü ministerliklerin temsilcileri hep ölä memleketin sekretarin yardımcısı Aleksandr Yakub. Buluşmanın neeti — işlettirmää avtonomiyanın erli kuvetlerin hem devletin kurumnarın temsilcilerin aralarında dialogu.
Gagauziyanın hepsi yaşamak erlerin primarlarınnan buluşmanın çıkışlarına görä, memleketin sekretarin yardımcısı Aleksandr Yakub nışannadı, ani dialog pek faydalıydı. Onun laflarına görä, işin süresindä bakıldı bir sıra soruş, angıları baalı avtonomiyanın yasşayannarın merkaklıynan. Hep ölä geldilär bir fikirä , geçirmää deyni bölä uurda buluşmakları sıkça, decez — üç ayda bir sıra.
«Bän isteerim sölemää, ani buluşmak pek faydalıydı. Peydalandı konsensus çoyu soruşlarda, biz geldik bir fikirä, ani çeketti dialog merkezin hem avtonomiyanın aralarında»,- Aleksandr Yakub nışannadı.
Kıpçäk küüyün primarı Oleg Garizan, kendi sırasında hep ölä ii notaladı buluşmanın çıkışlarını. O çizgiledi, ani bölä uurda dialog çoktan lääzımdı olsun.
«Biz lafettik bakannık komitetin hem da merkezin kuvetlerin aralarında annaşmaları için. Herbir primar açıkladı o problemaları, angılarınnan karşı gelerlär işin süresindä. Buluşmanın ikinci payında biz açıkladık kendi korkumuzu bizim avtonomiyanın öndercilik görevinä seçimneri için, getirmää deyni onu kanon durumuna avtonomiyada»,- Oleg Garizan nışannadı.
Bölä lafetmäk uurunda formatın önemni için haberledi Komrat kasabasının primarı Sergey Anastasov. Onun laflarına görä, bölä buluşmanın baş neeti — üüseltmää deyni yaşamanın kalitesini avtonomiyanın yaşamak erlerindä hem da çözmää deyni baş problemaları, angılarınnan karşı gelerlär her gün erli kuvetlär hem insannar.
«İki saattan zeedä bakıldılar zamandaş soruşlar, angılarınnan biz karşı geleriz her gün. Bakannık komiteti — bu var nasıl sölemää primarlar, var çoyu soruşlar hem problemalar, angılarını annayamȇȇrlar türlü uurların deputatları , primarlar sa bilerlär, nezaman hızlı medik yardımın maşınası girämer adresa görä, açan köpeklär kaçınȇrlar, açan primariyaya ceza koyȇrlar. Da elbetki, biz brakamȇȇrız avtonomiyanın soruşlarını bir tarafta»,- Komrat kasabasının primarı Sergey Anastasov haberledi.
Protokol çekilerdän sora pressa izmetçilerini yalvardılar çıksınnar zaldan — ileri dooru buluşmak geçti kapalı formatta. Dialogun bitkisindä primarlar ilerlettillär kendi buluşmalarını GHT yapısında.
Moldovanın hem Gagauziyanın en mekalı haberleri GRTnın Telegram kanalında!