Gagauz Eri primarları oturuşu geçirdilär. Küü hem kasaba başları avtonomiyada olan politika durumu için lafettilär. Sonuçta deklaraţiya kabledildi. Bu dokumentin baş neeti — cümneyi hem politika kuvetlerini birleştirmää, GHT seçimnerini geçirmää deyni kanon istemeklerini kullanmaa.
Gagauz Erin hem Moldova kuvetlerinin aralarında olan krizis erindeki kuvetlerinin işini zorladȇr, türlü soţial hem infrastruktura proektlerinin geliştirmesinä köstek koyȇr. bu çıkışları primarlar yaptılar. Mardın 27-dä onnar maasuz oturuşa toplandılar. Primarların taa çoyu ses verdi onun için, ani Gagauz Erin hem Moldova kuvetleri aralarıda dialogu kursunnar lääzım, da hepsi soruşları çözmää deyni birliktä kuvet koysunnar. Deklaraţiya için Komradın primarı GRT-nın yayınında annattı.
«Primarların bakışları elbetki birtürlü diil. Ama biz politika durumu için çok lafettik. Herbiri kendi bakışını açıkladı. Ama sonuçta ses verdik. Primarların zeedä payı ses verdi onun için ani devlet uurnda buluşmak geçsin lääzım da birliktä karar kabledilsin lääzım. Primarlar sölerlär, ani GHT seçimneri geçirildinnär lääzım»,- primar Sergey Anastasov.
gagauz Eri Bakannık komitetin başın ȇks-yardımcısı N.Stoyanov alarak esaba büünkü politika durumunu kendi bakışını açıkladı.
«Sayȇrım, ani devletimizin kuvetleri, danışarak avtonomiyanın kuvetlerinä lääzım desinnär — geçiriniz seçimneri, ama biz herbir adımınızı göz altında tutacȇ. Er bişey kanona karşı yaparsanız biz karışacȇz. Ama seçimnär geçirilsinnär lääzım. Da artık GHT eni çarışınnan iş ilerlesin lääzım. Ama seçimnär geçirilmärselär bizim avtonomiyamız öndercisiz kalȇr. Bizä bu durum hiç uymȇȇr» ,- Nikolay stoyanov açıkladı.
Bakmayarak politika uurunda olan zorluklara Gagauz Erinin primar korpusu haberler, ani işini sırasıyca hem verili haklara görä ötää dooru da yapacȇk. Komrat kasabasının başı Sergey Anastasov çizgiledi, ki onun var umudu, ani Gagauz Erin hem Moldova kuvetlerinin temsilcileri tezlää buluşacȇklar da zorlukları çözmää başalayacȇklar.
«Sanȇrım, ani bu yakınnarda bu buluşmaklar geçirileceklär, da iş kanona görä yapılacȇk»,- söledi Stoyanov.
GHT seçimnerinin geçirilmesi hem büünkü gün kuvettä olannarın hakları için dä laf gitti. Bu bir ayırı soruş — çizgiledi N.Stoyanov. Çünkü kanon vermer izin uzatmaa deputat mandatların zamanını.
«GHT eni çarışı kurulsun lääzım. Seçimnerdän sora hepsi uurların öndercileri toplansınnar lääzım. Lääzım tanımaa, ani türlü yannışlıklar yapıldılar. Ama yapmaa ölä, ani onnar başka olmasınnar. İş kanona görä yapılsın lääzım»,- Stoyanov çizgiledi.
GHT seşimnerin günün deputatların kararına görä bu yılın iyun ayın 21-dä geçirilsinnär lääım. Ama Komratta Devlet kanţeläriyanın ofisi daavaya danıştı çizgileyeräk, ani GHT seçimnärlän baalı kararları yannış kabletti.
Moldovanın hem Gagauziyanın en mekalı haberleri GRTnın Telegram kanalında!