Kazayak küüyün «Güneşçik» uşak başçasında «Prost olmak yortusu-2026» festivali geçti. Yortulu olayda pay aldılar Kazayaktaт ikinci hem üçüncü uşak başçaları hem Baurçu küüyün yaslanın terbiedenneri.
Hazırlamak grupaların terbiedenneri gösterdilär gözäl oyunnarı, baalı Prost olmak yortusunnan. Olay geçti dostlu atmosferada. Yortuda bulundular Gagauziya üüretim bakannıın uzmannarı. Onnar urguladılar, ani bölä iniţiativaların hazırlaması verer kolaylık korumaa kultura adetlerini hem ilerletmää uşaklarda yaradıcılık becermeklerini. Festivalin baş neeti için söledi «Güneş» uşak başçasının başı Tatyana Varban: «Bizim uşak başçasında geçer bir gözäl Masleniţa yortusu, angısı düşer her keret büük orucun önündä. Biz uşaklara terbiederiz sevdayı bölä yortulara, bilsinnär biri-birinnän konuşmaa, biri-birini-prost etmää, er bişey dedisäydilär yada acıttısaydılar».
Kazayak küüyün «Kayıncak» uşak başçasının rumın hem gagauz dili üüredicisi Olga Ivoglo söledi, ani bölä buluşmaklar terbi ederlär uşaklarda sevdayı adetlerä.
«Bir adet, angısı kaldı bizä dedelerdän — prost olmak günü. Önemni o beterä, ki bizim borcumuz uşaklara vermää diil sade dili, ama baalamaa uşakları adetlärlän dä. Bileriz — halk ozaman yaşȇȇr, açan halkın dili kulturası — adetlär, yortular — bunnarı biz uşaklara veräbilärsäydık, bizdä makar umut var, ani uşaklar onnarı ötää dooru götürecek»,- Olga Ivoglo söledi.
Gagauziya Üüretim bakannıın uzmanı Lidiya Ostaş urguladı, ani bölä yortuların geçirilmesi herzaman üüsek uurda kaarşılanêr.
«Üçüncü keret geçer bu festival, angısı üüreder hem terbieder bizim uşakları sevmää bizim tradiţiyalarımızı, bizim gagauzların — neyi onnar yapȇrlar, yapardılar. Üüredicilär gerçektän hazırladılar çok gözäl bir yortu uşaklara»,- Lidiya Ostaş urguladı.
«Prostolmak yortusu» festivali Kazayakta bir adet gibi olêr- geçiriler üçüncü yıl sıravardır.
Moldovanın hem Gagauziyanın en mekalı haberleri GRTnın Telegram kanalında!